المقابلة الشخصية

[Dr.6m0o7]

السلام عليكم ورحمة الله وبركاته

ارغب من الحضرات اعضاء وعضوات المنتدى الافاضل
افادتي بشان المقابله الشخصيه
لرغبتي في الالتحاق بالكليه
فارجو منكم
اعلامي بكيفية اجراء المقابلة
عن الاسئله التي قد ترد فيها
وغير ذلك
افادني الله واياكم
ماجورين

اختكم

[dr_perfecta]

السلام عليكم د.طموح
واهلا وسهلا بيك.. :12: :12: :12:
واضح انك شايله هم المقابله الشخصيه , وهذا شيء طبيعي...
لكن لاتقلقي كتير لان اهم شيء في المقابله الشخصية إنه الواحد يكون هادي قد مايقدر 0

ثانياً المقابله الشخصيه عليها 10% و50% من نتيجة القبول حاتكون للاختبار االتحريري
بالنسبه لنوعية الاسئله مافي شيء معين ,حسب اتجاة الحديث مع الطالب او الطالبه
ممكن يسألوا عن ابيات شعر ,امور دينيه,أو عن آخرالتطورات السياسية ,
واستعملي بعض الستراتيجيات زي:
1)لما تدخلي الغرفه او حتى اذا خرجت امشي بخطى هاديه واذا جلست اجلسي بهدوء واهم شىء القي التحيه بكل ثقه ومعاها ابتسامه
2)فيه نقطة مهمه كمان إنة في اثناء ماتجاوبي فكري انه انت في مناقشة مع اشخاص تحترميهم عبري عن اجاباتك او آرائك بثقة وصوت واضح,ولا تحطي في بالك انك في اختبار شفوي, واذا ماعرفت الاجابه لبعض الاسئله مو مهم, المهم انة تكوني متماسكه وهاديه
3)وحاولي انه ماتقولي اجابات تناقض بعضها مثلا
اذا سألوك تؤيدي قيادة النساء للسيارات وقلت لا ,سالوك طب ليش قلت لانه مايتوافق مع استعدادها الجسدي مثلا
وبعدين يسالوك طيب فية نساء يسوقوا مو بس سيارات بيسوقو طيارات كمان وماشا الله عليهم مافيهم اي عله


:122:

ساعتها حاولي توضحي رايك اكثر ولاولاتناقضي فكرتك.......

عموما طموح اتصرفي زي مايقلك عقلك لانة كل واحد عنده راي لكن انت بس عندك طريقتك اللي حاتوصل بر الامان......اعطي نفسك فرصه

عزيزتي:
كل اللي دخلو مقابلات شخصية خرجوا وهم يقولوا خلاص انا ضعت ماتصدقوا قد ايش لخبطت وارتبكت غير الاسئلة اللي ماعرفت اجاوب عليها, وكلامهم طبعا صحيح.
وفي النهايه هادول كلهم طالعين سنه تانيه


واخيرا ارجو انه مااكون خوفتك زيادة


BE YOUR SELF


مع ارق تحياتي

:12: :12: :12:

[Dr.@7m@D]

هلا يا دكتورة


مبرووووك على تخرجك :12: :12:

وانشالله تنقبلي في كليتنا

الله يقويه ما قصر وقال كل شي مفيد بس احب اضيف شوووووووية اشياء perfecta دكتور

اذا سؤولكي سؤال ما تعرفي لا تعباطي :ya:

قولي ما اعرف والله ما مر عليا
بس مو تزوديها :K:

حافظي على الابتسامة في وجهك دايما عشان تخفي توترك وطبعا كل شي باعتدال

يسألوكي ايش تحبي تقري؟؟

ايش الجرايد اللي تقريها ؟؟
ايش اكثر مرض منتشر في المملكة ؟؟
ايش تعرفي عن الاستنساخ ؟؟
وبمناسبة فصل التوئمين اليومين دي اتوقع يسألو عنهم
واهمممممممممممممم سؤال
ليش اخترتي طب ؟؟؟؟؟؟؟

اذا سألوكي بالانجليزي جاوبي بالانجليزي اذا قدرتي واذا ما قدرتي جاوبي بالعربي بدون ما ترتبكي بس حاولي بالانجليزي

اهم شي ما تتفلسفي


الله يوفقك

اخوكي

dr.a7mad

[WaLeeD]

<center>

السلام عليكم ورحمة الله وبركاته

اهلا وسهلا طموح ومرحبا بيكي بين اخوانك واخواتك

طبعا الدكتورة فتو قصدي بيرفكتا والدكتور احمد ما قصروا واعطوكي امثلة على الاسئلة اللي ممكن تجيكي

وانا برضه جاتني اسئلة كوووولللللها سياسية وجاني سؤال قيادة المرأة للسيارة وقلتللهم اصلا المرأة السعودية ما عندها شجاعة تسوق دراجة مو سيارة خخخخخخخخخ وطبعا الدكتور عجبه الجواب مرررة

اممممممممم

بس عندي نصيحة صغنطوطة

انتي لا تعتبري نفسك انك رايحة مقابلة شخصية

اعتبري نفسك مثلا جالسة في المطار ومنتظرة وقت الاقلاع وجوا ناس جنبك وصاروا يسألوكي اسئلة ، وطبعا انتي ما تعرفي ايش حيسألوكي ولا حتى استعديتي لأسئلتهم ، وعشين كده اي سؤال حيسألوكي حتجاوبيهم على قدر معلوماتك وعلى قدر يا موسى ، فهل انتي وقتها حتشيلي هم لأسئلتهم ؟؟ اكيد وطبعا لا ، وبكده وبتفكيرك بالطريقة دي حتزيحي من دماغك فكرة الخوف والارتباك دا ، ووقتها حتكوني كووول وهادئة وواثقة من نفسك ، واهم شي تحلي في الاختبار كويس

وانتي قدها وقدود يا طموح ويكفي الاسم اللي اخترتيه لنفسك

ان شاء الله بعد كم يوم تفرحينا وتبشرينا

وانا اذكرك بشي واحد بس

قل لن يصيبنا الا ما كتب الله لنا
وكل ميسر لما خلق

و لاتنسي كمان صلاة الحاجة وبرك بوالدك ووالدتك

في المقابلة الدكتور سألني مين جورج قرنق قلتلله ما حصللي الشرف ههههههههه ، تعرفوه يا جماعة ؟؟

تحياتي
:12:

[Dr.6m0o7]

السلام عليكم ورحمة الله وبركاته

مشكووووورين يا جماعة الخير
رفعتو معنوياتي
الله يعدي القبول على اخير
واتشرف باني اكون وحده منكم وفيكم
صراحه انا متابعه المنتدى من بداية ما انشا
بس كنت منتظرة اني اتخرج وانقبل في الكلية عشان اسجل
وبما اني احتجت مشورتكم بكرت في التسجيل
عمموما شكر عمييييييييق ل د-بيرفكت ود-احمد ود- ليدو
ويارب الاخوة والاخوات الباقيين ي قولولي عن تجربتهم عشان استفيد ويستفيد كل المستجدين
وعندي سؤال
مين الدكاتره الي بيعملو المقابلات؟؟؟؟؟
وهل هم دكاتره والا دكتورات والاا الاثنين سوا؟؟؟؟؟؟؟؟
واذا كانو دكاتره فهل عن طريق الشبكه التلفزيونيه والا عن وجه لوجه؟؟؟؟؟
نفع الله بي وبكم

خالص احترامي وتقديري

اختكم

[Dr.DeDe]

سلام لأحلى اعضاء

ولأحلى عضوة .. باذنه تعالى تنقبل ونشوفك معانا
---
طبعا ابى اقلك عن تجربتي و تجربة صديقتي الحبيبة ميس

انا يوم اختباري كانوا دكتور و دكتورة .. وطبعا لأننا في ام القرى
حيكون الدكتور شبكة
يومها .. كان د. أحمد بادريق و الدكتورة عبير بوقس
يومتها كنت واثقة من نفسي .. ولله الحمد انقبلت
الدكتور احمد .. ما كان يعطيني فرصة
سؤال ورا الثاني .. تعبت بصراحة مرررررررررررررة
بس ولله الحمد جاوبت عليهم كلهم .. كان يحاول يحصرني باسئلته عشان ما اقدر اجاوب
اهم ما كان في مقابلتي معاه .. كانت صورة .. عبارة عن طلاب طب حول جثة
طلب مني التعليق عليها .. انا بصراحة بلهت قدامها و قلتله لا تعليق
ما عجبه جوابي .. بس عدت على خير
الدكتورة عبير .. اسلوبها هادئ و مطمئن .. وجودها بس كان يخفف الموقف شوية
بس بعد ما سألتني .. اكتشفت اني من معوقات تقدم الطب في الممكلة
بس في النهاية انقبلت .. وذا بفضل الله

اما .. ميس
كان د.هاني غازي ... و الدكتورة نازك
كانت اجوبتها ... مو مرة مقنعة .. بس اسلوبها عجب الدكتور
ما كانت تجاوب بنفسية حلوة .. و كانت اجوبتها تضحك
وفي النهاية انقبلت

هو يعتمد على الدكتور ... تبعا لذلك الاسلوب
انا ما عندي فكرة عن باقي الدكاترة .. لأني حتة سنة اولى لسه طالعة تانية
ما عندي خبرة ممكن افيدك
بس د. احمد صعب شوي ... وحاولي تكون اجاباتك متزنة
لأنه عمل المقابلة لكثير ... ونتيجة لاجوبتهم
حولهم لعلوم طبية ... مع انه نسبهم حلوة و عالية جدا
حتى اعلى من نسبتي انا شخصيا

اتمنالك التوفيق من كل قلبي .. وانشالله نشوفك معنا
اهم شي اختبار القدرات .. او القبول .. والمقابلة لا تشيلي همها
اتوكلي على ربك .. وربي يخترلك اللي فيه خير لك

تحياتي:12:

[RoSa]

أختي طموح ..
يا هلا بيكي بالمنتدى ..
و إن شاء الله ربي يسهلها لكي و لبقية المتقدمين و نشوفكم معنا إن شاء الله ..
بالنسبة للمقابله مثل ما قالو الدكتورات و الدكاتره ما قصروا ماشاء الله ..
أهم شي تكوني واثقه من نفسك و هاديه و صريحه و تكوني مقتنعه بإجاباتك مشان غير يقتنع بيها ..
في مقابلتي..
سألوني عن الحجاب و كيف ممكن تتأقلمي مع عملك ؟ و هل أهلك حيوافقولك إنك تعملي في مجال اختلاط؟
و اذا اتزوجتي و طلب منك زوجك تتركي عملك توافقي و لا ترفضي ؟
و هل سبق و زرتي مستشفيات قبل كده؟ و اذا زرتيها بأي صفه كانت الزياره ؟
أعتقد سألوني عن شي طبي و الله ما أذكر ..
وأي شي ما أعرفه أقول ما أعرف ..
و بعدين قالو اتكلمي عن نفسك بالانجليزي ..
و هذا اللي أذكره الآن :)

يعني تقريبا كلها أسئله عامه ..
و إن شاء الله ربي يوفقكم ..

و إن شاء الله أكون أفدتك :)

تحيّاتي ..

[د. مـيـس]

اولا نرحب بيك اخت طمووح وانشالله نشوفك معانا في الجامعه
وتحققي طموحك الي انت بتتمنيها
انا بصراحه كنت ابغا اقللك على تجربتي علشان اولا واخيرا تعرفي
ان اولا واخيرا اذا ربنا كاتبللك نصيب هتدخلي الطب من اوسع ابوابه
مهما كانت المعوقات لان بصراحه كل مافتكر تجربتي
بقول وعسى ان تكرهوا شيئا وهو خيرا لكم
يعني لسا كنت بحكي لديدي عن تجربتي اليوم العصر وهي حكمت ان اجابتي بتضحك
فما باللك الدكتور ههههه:85:
انا قدمت في الرياض وانقبلت صيدله فمره اقتنعت اني اروح وماكنت ابغا انقبل في مكه فكنت رايحه المقابله وانا معلنه الحرب وكان ذا سبب لقبولي اني دخلت واعصاببببي باااااارده
فالاخوان ماقصروا قالولك مره هدي اعصابك وكوني ريلاكس يعني انا حاولت جاهده انهم يطردوني تخيلي
كل حاجه ماعرف .. اول مره اسمع بيها .. هههههه حتى لما قالوا اتكلمي بالانجليزي عن نفسك قلتلهم عن اسمي وعمري وقتها ضحك الدكتور
شوفي من الاسئله الي انسالت
المناهج الدراسيه ايش رايك فيها.... خطة التعليم بالمملكه هل هي ناجحه .... التدخين ... الاستنساخ ... الشخصيات السياسيه .. المجلات والجرايد ورؤساء التحرير.... سالوا كمان عن اذا اتزوجتي ورفض زوجك وظيفتك ايش ردة فعللك لاتسوي زيي قالوا تسيبي الطب ولا زوجك قلتلهم لاذا ولاذا مابترك احد
ههههه اجابه دبلوماسيه
كمان قالوا لو فرضا كنت اخصائيه مختبر مع صديق ليكي وكان بيستغل انك بنت وبيعتمد عليك كليا في الشغل وبعدين المجهود بينسب له كيف ممكن تتصرفي
سالوا عن تقراي كتب واذا اتفلسفتي وقلتي ايوه هيسالوكي عن المؤلف وعن اهم الموضوعات بالكتاب
ممكن يسالوكي اذا ماقبلناكي ايش رده فعللك
عن التطعيمات كمان وليش ترتفع درجه حراره الطفل بعد التطعيم وايش اخر تطعيم وهل جدري الماء له تطعيم
ذا الي بتذكره بصراحه بس لاتنسي اهم حاجه ثقتك بنفسك والهدوء
وربنا يوفقك انشالله
تحياااتي

[Dr.6m0o7]

السلام عليكم ورحمه الله وبركاته

مشكوووورين اخواتي على مساهمتكم في الموضوع
الحمد لله اليوم رحنا الجامعه وقدمنا طلبات الالتحاق واخذنا الاستمارات
بس الجامعه شي ثاااااااااااااااني
غير الي تخيلته
يعني ما لقو الا اخر بقعه في مكه يحطوها فيه
:d:

اختكم

[reda0007]

السلام عليكم ورحمة الله وبركاته

اهلا بك اخت طموح عضوه في المنتدى وزميله في الكليه إن شاء الله
واتمنى التوفيق لكي ولجميع المتقدمين طلابا وطالبات

ما شاء الله الأخوان والأخوات ما قصروا اعطوكي نصايح كفايه
وهنا بعض النصايح اللي اتمنى ان تستفيدي منها

اولا , حاولي رفع ثقتك بنفسك وكوني واثقه ان قدراتك ومعلوماتك سوف تؤهلك بقوه للقبول
يعني إذا كانت طموح ما راح تنقبل مين بقي حتى ينقبل ههههههههه :eye:

ثانيا ادخلي المقابله وحاولي ان تتخلصي من الشد بقدر ما تقدري
وتصرفي بتلقائيه
ولا تتسرعي في الرد
وفكري في السؤال جيدا
وإذا اتسألتي سؤال طويل ,اسمعي مظبوط
وإذا خلص الدكتور السؤال قوليلي كلمه وحده

طيب :LL:
وخدي راحتك في التفكير

وإذا اتسألتي سؤال محرج او مو متوقع
ابدأي الإجابه بإبتسامه
ولا تعطي جواب قاطع يعني مثلا كتير من الكلمات
لكن ......... من الممكن ........... هذا ما يعني إن ........... في هذه الحاله

في شي مرررررره مهم
حاولي تربطي دايما الكلام الي تقوليه بالدين
يعني لا تجاوبي سؤال عام " مهو علمي " بس من منظورك حاولي تربطي ربط ديني

وفي شي اخير مهم
وهو حضري للمقابله ........كيف ؟
إنتي في المقابله راح توجهي المقابل على حسب كلامك
فمثلا قبل اسبوع من المقابله حاولي مطالعة كتاب معين والجرايد والأخبار
يعني خليكي عارفه إش الحاصل
انا مثلا اتقابل معايا الدكتور طارق عاشور
وانا قد جهزت كتاب مظبوط عشان لو سألني اتفلسف عليه وقريت الكتاب مزبووط
المهم سألني تقرا كتب ...... قلتلو إيوه كيييييييف :o:
قلي إش آخر كتاب قرأتو ........ قلتلو اصول علم النفس
سألني إش اسم المؤلف " يبغى يحشرني " ...... قلتلو احمد عزت راجح
شويه جاء يبغى يسأل ........قلتلو متخرج من جامعة القاهره
ضحك ....... قمت قلتلو وحاصل على الدكتوراه في علم النفس من فرنسا

هههههههه يعني بالأصح جاء يبغى يحشرني قمت حشرتو انا :122:

وأخيرا
بس خلي عندك معلومات عن المواد اللي راح تدرسيها في الطب راح يسأل إش هيه وإش ترجمة الإسم الإنقليزي لكل ماده

وآسف جدا على الإطاله
سلام

[Heart Pulse]

اهلين وسهلين باالطموح يارب يعطيكي على قد نيتك انتي وكل المتقدمين


صراحه انا كنت في يوم الاختبار والله كان الموقف مرعب خصوصا لمن اتأخرتوا في الاختبار
تخيلوا ياجماعه انوا الاختبار ماخلص قبل الساعه وحده؟؟؟

انا الا بره تعبت ايش حال الا جوه
الله يكون في العون

انا عن نفسي ياستي في المقابله الشخصيه عملت فيها ديك البنت الفتكه رحت ليلة الاختبار واشتريت كتاب عن المقابله الشخصيه اسمه<<كيف تواجه المقابله>>من تأليف"كليف فلتشر"
صراحه هو مفيد اكتر للناس الا رايحين مقابله وظيفيه اكتر من مقابلة كلية طب

وليلتها ما نمت الين ما كملت الكتاب لكنه افادني نوعا ما

اما يوم المقابله اتلطعنا لطعه بطاااله علشان كده لمن تروحي عبي نفسك انك حتجلسي وقت طويل
اما عن الدكتور والدكتوره الا جوني فإلى الان انا ما اعرفهم:85:

الدكتوره من المستشفى قالولي اما الدكتور فإلى الان ما عرفت من هوه
طبعا لمن يسألك عن اسمك عرفيه بنفسك ولا تغلطي غلطتي وأسأليه كمان عن اسمه

سألتني الدكتوره عن شوية اسألة وماشاء الله الاخوان فوق ماقصروا بس اكتر سؤال راكز في بالي الى الان هو سؤال عن العنوسه<<<وسويت فيها ديك الفيلسوفه:122:

اما الدكتور سألني عن المواد الا راح ادرسها وعن ليش اني اخترت علوم طبيه فكان جوابي <<انا نفسي كنت ادخل طب لكن نسبتي 88.86% وطبعا ما راح يقبلوني طب فقررت اني ادخل علوم طبيه وان شاء الله احول>>
قام كبسني الدكتور وقالي << واذا ماقدرتي تحولي؟؟؟؟>>
طبعا صار شكلي :O: وقلتله ما أعرف لكن من الان لوقتها ربي يسوي الخير>>

سألني عن هواياتي قلتله اني احب اقرأ قام سألني ايش تقرأي
قلت له كتب وجرايد اكثر شي
وسالني عن الكتب وعن اخر كتاب قرأته قلتله عن كتاب << خلق الانسان بين الطب والقران للدكتور البار >>
قام راح زي عشره دقايق ورجع وقال لي << ورد في الكتاب عن الظلمات الثلاثه ممكن تشرحيها لي>>
وطبعا بما اني حافظه الكتاب حفظ وكمان زودت له معلومات لزيادة التأكيد


طبعا السؤال المتوقع هادي السنه عن مرض سارس وعن فصل التؤمين الايرانيتين
على فكره يسألوا عن القنوات الفضائيه وايش هي قناتك المفضله ونصيحتي ليكي انك تقولي <<سبيس تون او السعوديه>> علشان تورطي الا يسألك:o:

امزح ترى
اممممممممممممممممممممم

ممكن يسالك كمان عن خارطة الطريق <<وهادي اتوقعها مرررره>>
او متى قامت الحرب على العراق او في اي يوم سقطت بغداد
وكمان لا تقولي له اي هوايه انتي ما تمارسيها لازم تكون الهوايه من جد هي هوايتكOK
عموما ما شاء الله كل الا كتبوا قبلي كفوا ووفوا والله يعطيهم العافيه

ملاحظه
انصحك بشراء كتاب"دراسة الطب بين التحديات والمسؤليات للدكتور محمد باخطمه مررررررره مفيد"


اهم شي اتوكلي على الله وحاولي انك تكوني انتي مو شخص اخر

يارب وفقهم واعينهم وساعدهم وأعطيهم الا فيه الخير لهم


تحياتي
نبض قلوبكم