معاناتنا مع الجامعة .. تانية طب

[Dr.DeDe]

سلام لأحلى اعضاء


بصراحة اواجه بعض المشاكل في الجامعة واللي حاسة انه تانية كلها بيعانوا منها
حبيت انشر الموضوع في المنتدى .. لعل و عسى ان يصل صوتنا للدكاترة
هي مشاكل في كل مادة تقريبا بندرسها

الامبريولجي

مادة اعتقد انها ظريفة ... بما اننا لسه ما درسناها فطبعا ما اعرف عنها شي
نحنا اخذنا محاضرة .. مع الدكتور نواب
اول دكتور يعطينا وجها لوجه ... شي حلو ... نفهم اكتر ... و تقل رجة البنات وكلامهم اثناء المحاضرة اكثر
المشكلة .... انه وجودي في المحاضرة كان كعدمه ... ووجود اللي كانوا معايا نفس الصف
الاسباب :
1.القاعة تخلوا من المايكروفونات .. وصوت الدكتور ما بيوصل للبنات اللي في الخلف .
2.اصوات المكيفات عالية ... تغطي على صوت الدكتور .
3.القاعة ماهي مدرج ... يعني اللي جالس ورا الله يكون في عونه.
4.الدكتور يحتاج الى برجكتر لعرض الصور .. عشان نفهم اكثر ... بس للأسف حجم الصورة صغير و طبعا ما شفت ولا سلايد.

لو حليت مشكلتي .. و جلست في المحاضرة الجاية قدام ... اللي ورا حيضرروا
طلبنا نقلنا لمدرج .. بس للأسف قوبلنا بالرفض .. لأن القاعة اللي ناخذ فيها المحاضرة هي القاعة الوحيدة اللي لها مخرج منفصل

الحل : الله اعلم ... بس نحتاجه بسرعة .. لأنه محاضرة فاتتني شخصيا و ما ودي احد تفوته اي محاضرة

----
البايو كمستري

المشكلة ... فاتتنا محاضرتين في اول اسبوع ... ونظرا لذلك مضطرين نمشي في المنهج بسرعة
الاسباب :
1.البايو مادة ناخذها مع دكتور عن طريق الشبكة .
2.جينا ولقينا المبنى الجديد 3 قاعات منها ... يا الشاشة عطلانة او المايكروفونات او السماعات.
3.الدكتور يدور علينا و اللي في نفس الوقت نحنا ندور عليه .. عشان هالحركة .. يضيع وقت المحاضرة.
4.الدكتور يدرس الاولاد و البنات .. فوده اننا نمشي مع بعض في المنهج ومحد فينا يسبق الثاني.

الاضرار : محاضرة بايو .. فهمنا اولها .. وآخرها ولله الحمد
حناخذ على راسنا في الدراسة .. ونمشي بسرعة عشان نوصل للجزئية اللي وصلولها الاولاد

الحل : الله اعلم ... بس يا ريت لو يكون البايو وجها لوجه ... نفهم اكتر
والدكتور كمان يعرف عن طريق انطباعاتنا .. فهمنا ولا نحنا ميح في المحاضرة

---
الفسيولجي

المادة بمنتهى الخطارة مع دكتور ابتكرلنا اسلوب جديد في المحاضرة
المشكلة تتلخص ... بانه ضاعت علينا تقريبا ساعتين من اصل 8 ساعات المفروض ناخذها
هو الدكتور شوي سريع في المحاضرة .. بس كلنا فاهمين ولله الحمد
في كل محاضرة .. نلعب مع الدكتور ... يدور علينا و نحنا ندور عليه ... طلب مننا حل
بس للأسف ضيعنا من وقت المحاضرة اكثر

الحل : برضو الله اعلم
وبرضو لو لجأنا لحل وجها لوجه حيكون مناسب جدا


---
يرضيكم يا عالم اللي بيحصل عندنا
بلييييييييز نبى حل سريع ... لأنه اصلا نحنا ضايعيين ضايعيين


وتقبلوا تحياتي

[RoSa]

<center>

هلا دكتوره ديدي ..
كل سنه و انتي طيبه ..
و الله يكون بعونكم و يوفقكم يارب ..

اممممم ..
بالنسبة للمشاكل اللي حاصله معاكم ..
لاحظت إنك واضعه جميع الحلول وجها لوجه مع الدكتور ..
حاولو تشيلو الموضوع ده من بالكم و تدورو حلول تانيه لأن غيركم كان أشطر :)
يعني حاولو تنسقو الموضوع مع المشرفات تبعونكم ..
قدمو شكوى لأستاذه سوسن ..
أو الدكاتره ياخدو موقف حاسم يخليهم يهتمو بالموضوع ..
و أنا شايفاهم بيحاولو يصلحو الوضع ..
وبالنسبة لدكتور نواب أنا اللي أعرفه إنه كان يعطي محاضراته في المشرحه ..
و كل الدفعات كانو يعانو من نفس الموضوع ..

الله يكون بعونكم .. و يسهّل عليكم
عارفه ان المنهج عندكم مضغوط .. شدو حيلكم ..

تحيّاتي ..

[dr.ammooory]

السلام عليكم ورحمة الله وبركاته

dr.dede
اذا كان هذا من جد الي بيسير عندكم المفروض تقدموا شكوى وما تسكتوا لييييييييييييييييش ؟؟؟

1- احنا عكسكم تماما ابتداء بالميكروفونات مرورا بالقاعات المدرجة الجديدة انتهاء الي البروجكتور الجديد الي الدكاترة بعضهم ما يعرفوا يشغلوا وينادوا مسؤؤلين يشغلوا

2- مكيفاتنا مركزية جديدة مالها صوت

3- الامبريولوجي/ الهستولوجي مع د.نواب كأنك في سينما بس ناقص بوب كورن

انا كتبت هدا الكلام بس عشان تعرفي كيف احنا بندرس عشان تقدموا شكوى ويوفروا لكم نفس الاشياء الي موفرينها لنا سواء كنا طب او علوم طبية

احنا عندنا مشكلة بسيطة ونعاني منها بشدة الشمس الحارقة الحارة المولعة الملهلبة وسط صحراء قاحلةحتى الفي كول(تضليل عازل للحرارة) ما يمسك مع الشمس نضطر انو نوقف سياراتنا بعيد مرة مررررررررة ونتأخر على المحاضرة بس نفسي يكون لنا مواقف زي الهندسة لانو عندهم مبنى من 3 ادوار مخصص فقط كمواقف سيارات
واالصراحة احنا زيكم بنلعب لعبة مين يلحق المحاضرة لانو بنضطر نسعى بين مبنى الكلية والمعامل

الله يعينكم ويوفقكم وشدي حيلك وبالتوفيق

تحياتي

[Dr.DeDe]

سلام لأحلى اعضاء


عزيزتي روزا
فاكرة كلام طناش ... واننا قد ما نشتكي ما ينفع
احتمال هو دا سبب انتقال بتورة الى جدة

ما اقلك وجها لوجه هو الحل ... اصلا هو شي مستحيل ابدا انه يحصل
نحن في ام القرى .. وهاذي تحتها مليون خط
اما بالنسبة للاستاذة سوسن .... تعبنا ونحنا نتكلم عشان الامبريو على الاقل
ومافي فايدة ... بتقلنا نكلم الدكاترة الرجال
واحنا طبعا ما نقدر نفح فمنا
بس نبى حل سريع .... لأنه مرة زعلانة فاتتني اول محاضرة .. و كانت بجد ممتعة
فمين اللي حيشرحلي ... الطالبات اللي اعلى مستوى مني .. يا دوب اقابلهم
يعني خدي على راسك واسكتي

طنش تعش ولا مو ؟؟

اما بالنسبة لك د.عموري
عارفة حالة الاولاد ولاحظت تسليك التكييف المركزي في مبانيكم
ايش نقول ... في النهاية نحنا بنات
هو بس لو يوفرولنا مدرج
وحكاية تنظيم القاعت شوية ... والله الاسبوع هذا بنجري في المنهج جري
كأننا عباقرة زماننا .. نفهم بسرعة


الله يعدي السنة على خير
ونلاقي حل للمشكلة قبل ما تتراكم علينا المحاضرات

تحياتي

[Cardiac Arrest]

طنش تعش تنتعش :)

[RoSa]

<center>
هلا د.ديدي ..
بردّي الأوّل كنت حابّه أنبهك إنكم تشيلو حكاية وجها لوجه من بالكم مشان ما تنصدمو بالرفض أو يقلل الرفض من عزيمتكم .. و كويس انكم عارفين الوضع :)

الآن حابّه أقولك لا تيئسو ..
كلمو الدكاتره الرجال .. و ما يحك جلدك غير ظفرك
يمكن ما يكون هناك حل فوري للوضع ..
لكن أصواتكم هيّا اللي حتنبّه المسؤوولين للوضع و تصير هالنقطه في بالهم ..
جميع من أعرف ممن درس في الطب كان يشكو من نفس الأمر مع دكتور نواب ..
طبعا أنا ما حصل لي شرف الدراسه معاه ..
بس الكل أجمع إن شرحه رائع و المشكله بس صوته المنخفض ..
تعرفي لو يحاولو يوفو لكم مايك بسيط إذا مافي إمكانيه لحل تاني ..
إلى ما يفرجها ربنا ..

صدقيني أكيد المسؤولين بيحاولو يوفرو لنا سبل الراحه ..
و الدليل القاعات و المعامل الجديده و المباني اللي بتتبني و كل ده دليل على نيّة التطوير ..
بس زي ما يقولو أكل العنب حبّة حبّة ..
و أكيد إنّهم ما راح يلاقو حل فوري لأي موضوع يواجههم ..
و لو ما كان ده العنب من نصيبكم يمكن يكون من نصيب اللي بعدكم و وقتها يدعولكم :)

لا تيأسو .. خليكم ورا الموضوع ..
و إن شاء الله حتلاقو مين يطّلع على الموضوع و يهتم بيه ..

الله يوفقكم و يعينكم..

على فكره ..
طمنتيني على بتوره .. استفقدتها أول السنه ..
سلمي عليها اذا كلمتيها ..

تحيّاتي ..

[Dr.DeDe]

سلام لأحلى اعضاء

شكرا روزا على تفاعلك مع الموضوع
لأنه والله جايني احباط من حكاية الدراسة هاذي
بايو و الحمدلله ماني فاهمة شي ... امبريو مادري عنه شي
يعني ماشية على الله

والله يا عزيزتي .. حبذا لو تسميلي اسماء دكاترة ... نقدر نكلمهم و عندهم استعداد انهم يتقبلو اقتراحاتنا
او يسمعوا شكاوينا ... للأسف ما عندي غير رقم د.احمد بادريق
واللي هو طبعا اتنازل عن الشؤون الاكاديمية


تحياتي

[RoSa]

<center>

اعتذر عن تأخري بالرد ..

ايش صار في موضوعكم ..؟
اتوقع ان الأوضاع على ماهي عليه ..
الله يكون بعونكم ..

شوفي حاولي تتصلي برئيس قسم الأناتومي بس أنا ما اعرف مين هو ..
اذا مالقيتي تجاوب كلمو دكتوره مايسه المسؤوله الأكاديميه عندنا ممكن تكلميها بالجامعه في مكتبها..
و اذا مالقيتي تجاوب من دكتوره مايسه كلمو دكتور باسلامه وكسل الشؤون الأكاديميه ..

الله يكون بعونكم و بالتوفيق يارب ..

تحيّاتي ..