قرار المحاضرات ايام النصفي ؟؟ راضيين عنه ؟

[Dr.DeDe]

سلام لأحلى اعضاء

بصراحة طفشت من كثر ما اشتكي من الجامعة
فحبيت اغير هالمرة و اخلي الموضوع .. ينطرح للنقاش


سامعة هالايام من البنات بشرى صعقتني بشكل لا يصور
و كانت هاذي بصراحة ردة فعل كل طالبات الدفعة الحلوات

و الخبر بأنه .. النصفي غير انه في رمضان .. وغير انه يوم 7
حناخذ اياميها محاضرات .. كأي يوم دراسي عادي
شي بصراحة ماني عارفة كيف اوصف صعوبته ... يعني انه في رمضان
مضطرين ... ولا متى حنختبر ... بس كون اننا ناخذ محاضرات هاذي مرة صعبة

كطلاب و طالبات طب و علوم طبية ... علينا اننا نذاكر كل محاضرة بمحاضرتها
واننا اقل شي نرجع نقرأ .... بس عشان نثبت المعلومات
ايام الدوري عانينا كثير ... واللي بدأ يبان نتائجه في محاضرات الاناتومي
كنا نذاكر للدكتورة الفاضلة اول بأول .. بس مع الدوري
يا دوبك بنذاكر اللي داخل في الاختبار .. مع انه هاذي المادة المفترض حافظينها لأننا بنذاكرها باستمرار
بس الكل عارف ... انه لازم نحفظها مليون الف مررررة
هذا واحنا ثانية .. المواد اللي عندنا لا تذكر بشئ بجانب مواد سنة ثالث
فلو كان الاختبار اسبوعين ... صحيح راحة لهم .. بدل الضغط لمدة 6 ايام ورا بعض
بس على كدا ... حيهملوا المحاضرات اللي بياخذوها ايام الاختبارات ولا ؟
طيب ... حنقول هو 3 اسابيع رمضان ... بعدها اجازة اسبوعين .. نذاكر اللي فوتناه في الاسبوعين هاذي
على كدا ... ما استفدنا من رمضان شي ... و حنفقد بركة الشهر هذا
بالمحاضرات ... واحنا يا دوبك بنلحق ... نصلي و نقرأ قرآن ... و نتسلى بكم المحاضرة اللي اخذناهم
وجود الاختبارات ... حيخلينا نركز على الاختبارات .. صحيح حنعطي وقت للصلاة و القرآن بس حيكون القدر القليل
وغير اللي بيداوموا من جدة و الطايف ... متى حيناموا .. متى حيقرأوا .. متى حيذاكروا .. ومتى و متى


يا جماعة الاختبارات قربت ... ولازم نناقش الموضوع مع المسئولين ... لازم نتحرك
اولاد وبنات ... او انكم تقنعوني انه القرار هذا ما حيشكل اي ضرر علينا


تحياتي

[Cardiac Arrest]

موضوع جيد

برأيي أعتقد أن الكلية أدرى بمصلحة الطالب
وهي تحاول ساعية لتطبيق قرار مدير الجامعة بإستمرار الدراسة أيام الإختبارات

ومهما يكن فأعتقد ان الدكتور باسلامة سيبذل قصارى جهده من أجل أبنائه الطلاب


لكن الغريب فعلا

هو عدم نزول الجدول إلى الآن!!

شكراً

[H@SSOOM]

السلام عليكم

هو فعلا شيء مفزع


سمعت انا انه راح يكون في دراسه بس في اوقات المعامل


يعني في محاضره اللاب راح ندرس نظري في ايام الاختبارات


مهما كان الوضع برضو صعبه في رمضان


وعلمت ان هناك تحرك من طلاب سنه ثانيه طب

كتبو ورقه باساميهم ووقعوها وارسلوها للدكتور باسلامة



اما طلاب السنه الثالثه فاختلفوا

منهم يقول

خلو الاختبارات اسبوعين بدراسه

ومنهم يقول

اسبوع واحد بدون دراسه


والله يستر


سنواجه مرحله صعبه في الايام المقبله فنسأل الله أن يكون في عوننا

[Dr.DeDe]

سلام لأحلى اعضاء


قرأت الردود .. وبصراحة ما عرفت رأيكم يا جماعة
انتم مؤيدين ولا معارضين ؟؟؟؟

نحنا فكرنا بنات تانية طب اننا نوقع اعتراض ... بس هل حيسمعوا لنا
وعلى فكرة يا جماعة .... اللي اقترح هالاقتراح ثالث علوم طبية
و الدكتور باسلامة ... ما اعترض عليهم

هو بصراحة ما حتفرق كثير ندرس ولا لأ
بس لو فكرتوا فيها ... حتكون الاختبارات في ايام رمضان
كفاية حتكون اعصابنا مشدودة بسبب الاختبار ... و حنتنح في المحاضرات
وغير اللي يداوموا من جدة و الطايف
والله يا دوبك نوصل بيوتنا ... ننام عشان نقوم و نذاكرلنا كلمتين عشان نرجع ننام تاني استعدادا لبكرة

فهل حيمدينا على كدا نذاكر عشان النصفي ؟؟

تحياتي

[Dr.@7m@D]

اول شي
سلام شباب كيفكم

وبعدين

لااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااا

انما اعترض وما اواااافق على دا القرار :waa:

بس طبعا مين يسمعلنا ؟؟؟؟؟؟؟؟؟؟؟؟؟؟؟؟؟؟؟؟؟

القرار احنا مالنا اي فايدة فيه

وبعدين احنا في الايام العادية بالقوية بنفهم ، كيف في رمضااااان

احنا سنة تانية صح اتحركنا :33:

وكتبو الشباب ورقة ومرروها في محاضرة البايو

<<< وقع عليها يحسبها اتندنس :o:

وبس


انشالله يسوو شي

طيب على الاقل بدل الدراسة في رمضان صلحولنا المواقف :ya:
((مدري اش دخل دا في دا بس مشي حالك ))

ديدي

انتو كمان سوي شي

هما يسمعو كلام البنات دايما :wooow:


والله يعيننا ويوفقنا

وكووول سنة وانتو طيبييييين

و بااااااااااااااااي

dr_a7mad

[Dr.DeDe]

سلام لأحلى اعضاء


والله يا دكتور احمد ... حنحاول
بس اعطينا فكرة .. او طريقة او اي حاجة نقدر نسويها
انا مستعدة و ممكن اقنع كل بنات تانية طب
بس نبغى ندور على طريقة مقنعة جدا
وانتم استمروا في المحاولة .. خصوصا وانه الدكتور باسلامة عندكم تقدروا تكلموه
نحنا ما نعرف متى حنقدر نكلمه او كيف حنكلمه

والله يكون في عون الجميع

تحياتي

[dr_messo]

شباب وبنات


لاتفضلو تندبو على حظكم فكل شي

وتقولو محد يسمع

وحد يهتم

اولا اتخذو السبل

وبعدين قولو محد سمع

اكتبو خطاب زي ماعملو تانيه طب اولاد

ووقعوه من الكل

ويتسلم للدكتور باسلامه

سواءا الاولاد ولا البنات

والبنات اللي يقولو مايقدرو يوصلو للدكتور باسلامه

ممكن يسلموه للمشرفه عندهم وهيا ترسلو

المهم انكم تعملو شي

وبالنسبه لاقتراح

الاختبارات اسبوعين مع الدراسه

دا الشي احنا كنا نستخدمو زمان قبل ماينزل قرار انو المد واحد اسبوع بدون دراسه

وانا اشوف انو خيار جدي اسبوعين حتى اريح نفسيا

عموما الامر يخصكم

وراجع لكم

اتحركو

ولاتفضلو

تتكلمو وبس

لازم من خطوات فعلييييييييييييييييه


فالدكتور باسلامه صديق الطلبة

ومع مصلحتهم دائما

ولا اعتقد انه صاحب القرار بل بالعكس يسعى لراحة الطلبة دوما

لذلك حينما تكون هناك معارضه كبيرة للقرار من الطلبة

والطالبات

وباكبر عدد من التوقيعات

يستطيع هو مخاطبة المسؤولين

وعرض عليهم شكوى الطلبة

[RoSa]

<center>

أهلا بالدكتورات و الدكاتره ..

صراحه أنا فرحت بالقرار ..

لأنّه فعلا تكديس الاختبارات في اسبوع واحد مأسااااة للسنه الثالثه خصوصا .. إلى جانب الكم الهائل في المناهج و الإرهاق الجسدي و النفسي ..و برافو على اللي اتكلمو بدري في لاموضوع ..

و بعدين اللي اعرفه ان مواد السنه الثانيه ماتزيد عن 3 أو 4 مواد ..
لو اتوزعت على اسبوعين مع دراسه ايش المشكله ؟؟؟

و بتقولو انه حيكون في تخفيف في الدراسه .. طيب ممتاااز جدا ..

هل اعتراضكم ان القرار في شهر رمضان ؟ يعني على وقتيته ؟
و لا على القرار بحد ذاته ؟؟


في جميع الأحوال أؤيّد القرار ..
و إن شاء الله إننا قادرين على التوفيق من جميع النواحي ..
و لا أعتقد أنّ القرار سيصدر إن لم يكن في مصلحة الطالب .. و إن لم يكن قد تُطرِّق له مرارا و تكرارا ..
و هذه وصلة لموضوع احتجاجات على تواصل الاختبارات في اسبوع واحد خلال العام الماضي .. و اللي من جد ما يحس بيها غير اللي عدّو السنه التااالته ..

http://www.uqumed.com/vb/showthread.php?s=&threadid=1618

و جزى الله دكتور باسلامه و جميع القائمين على شئون الكليّة عنّا خير الجزاء ..

تحيّاتي ..

[Dr.DeDe]

سلام لأحلى اعضاء


عزيزتي روزا ... انا معاك انه حيخف الضغط عليكم
صحيح انها موادنا 2 او 3
لكن تصوري انه مادة ما انفتحت ابدا ... السبب الاختبارات الدائمة في مادة واحدة من فروع الاناتومي
لدرجة اننا ما صرنا نفتح غيرها .... لانه كل يومين عندنا يا تسميع يا سبوتنج
طيب باقي فروع هالمادة ... مييييييييييييييح
المادتين الحلوتين اللي بجانهم ... الله اعلم عنهم
مسكاناهم .. لكن نحتاج لوقت يومين اقلها لكل مادة
طيب حنقول ايام الاختبارات حنتبحبح ... لأنها اسبوعين ... صح ؟
طيب ... اولا نحنا في رمضان ... شوفي متى حنروح الجامعة و متى حنرجع منها
ماهي مشكلة ما وقت المحاضرات نقص .... شي حلو
متى حنوصل بيوتنا .... مع العلم اني مو من مكة واعتقد باين من البروفايل تبعي
متى حاوصل البيت ... قولي على 6 الا ربع ... او اكون طيبة معاكي مرررررررررة 5
مع انه استحالة .... صح يا ميس ؟؟؟
صدقيني ...ابدا مافي وقت اني اذاكر
طيب ما نظلمكم يا سكان مكة ..... عشان ظروفنا
المحاضرات هاذي مالها حق علينا .. نفهمها ... نقرأها بعد ما ناخذها
نحنا في رمضان متنحين ... مع الاختبارات .. اعصاب مشدودة
تجمعيهم كلهم .... الناتج ايش يكون .... ما استفدنا لا من المحاضرة ولا من الوقت اللي قضيناه في الجامعة
وصدقيني لو كانت محاضرة دكتور ... وكانت شبكة ... مين اللي حتنتبه معاه ؟؟ كل وحدة جايبة المادة اللي بعدها
وتذاكر ... صح يا روزا؟؟

هو يمكن نحنا تانية مهولين الموضوع حبتين .... و في النهاية القرار عائد للجهات المسؤلة
هو الحل يا حيرضيكم يا ثالث ... او يرضينا
والله يكون في عون الجميع


تحياتي

[RoSa]

<center>
هلا د.ديدي ..

طبعا نحنا هنا في الموضوع بنقول آراءنا و نفكر بصوت عالي و اختلاف الآراء لا يفسد للود قضيّة ..

معاكِ حق في حكاية بنات جده و الطايف من جد الله يكون في عووووونكم ..

و الله يكون في عونكم على حكاية الأناتومي لأنّي دايم أسمعها كل سنه .. بس أكيد إنها تستاهل :)

أما بالنسبه للي حاعمله أيّام المحاضرات في رمضان إذا ما سمعت المحاضره ما أتوقّع إنّي حاذاكر شي تاني لأني أكيد حأنااااام ;)

بس آخر شي سمعتو عن الموضوع ما فرحني و لا حيفرحكم :(

ما ودي أصدمكم فيه .. لأنّه احتمال يكون و احتمال ما يكون .. الله أعلم ..

الله يوفق الجمييييع و يكون بعونكم ..

تحيّاتي ..

[Dr.DeDe]

سلام لأحلى اعضاء

شكلهم الاعضاء بيذاكروا ... وانا هنا باتسلى في المنتدى
ومعترضة لوحدي


عزيزتي روزا .... قولي اللي عندك ... عادي عادي
لأننا من يوم ما دخلنا الطب .. فقدنا الاحساس
فهاتي اللي عندك

اما انا .... اخباري غير
سمعت من ثالث انه جدولهم بيكون ... سبت و احد و اثنين و اربعاء و خميس و سبت
يعني ما فرقت عن جدول دفعة العام .... و ما خف الضغط عنهم الا في يومين

الله يكون في عون الجميع


تحياتي

[RoSa]

<center>
هلا د.ديدي ..

اللي عندي نفس اللي عندك ..

يعني اذا كان الوضع كده الجدول تقريبا مثل ما هو ما فيه اختلاف غير انه 3 مواد حيكون قبلها ايام فاضيه بعد ماكانت يوم واحد .. انجاز برضه :)

بس ما اعرف مو ده اللي كنت متخيلاه مع وجود قرار الدراسه اذا كان حيتقرر :(===> نسيو ياخدو رأي الأخت :D

الله يقدملنا الخيييير ...


تحيّاتي ..

[Heart Pulse]

<center>
السلام عليكم ورحمة الله وبركاته

ما راح اضيف اي نقطه للكلام الا انذكر فوق لكن

انا مقتنعه تمام الاقتناع ان انا بإذن الله اني راح اعدي واجيب احسن الدرجات حتى لو ما ذاكرت وحتى لو جبت العيد على ورقة الامتحان

تعرفوا ليش

لأني عارفه ان الدرجه الا كتبت لي من ربي هي الا راح اخدها سواء كان الاختبار كل يوم ولا كل عشره ايام

ديدي ياقلبي لا تزعلي من الموضوع بالطريقه دي ودايما حطي في بالك انك راح تعدي وراح تكون الافضل
اتفائلي بالرغم من كل الظروف الصعبه علشان تقدري تعدي وتواصلي المشوار
صحيح ان من حقنا الاعتراض لكن افرضي ما حصل؟؟؟؟
ايش راح تعملي

السنين الا قبل كده اتذكر اني كنت ابكي ايام الاختبارات من الضغط
لكن السنه دي بالذات عندي ماشاء الله تبارك الرحمن شحنة تفاؤل كبيره جدا
بالرغم من ان الضغط مضاعف

اعتبري ان العلم والتعب الا بتتعبيه دا لوجه الله وشوفي اذا ما الله وقف معاكي ومع الجميع

وبعدين لا تنسي انك تصلي في جوف اليل وتطلبي الله انه يسهلك الامور ويرزقك باحسن الدرجات وربي ما يخذل عبده فما بالك لو كان في رمضااان

الا زاد تفاؤلي اكثر ان لمن تختبري في رمضان يكون باب السماء مفتوح وساعتها ادعي بالي تبغيه

يارب وفقنا واعيننا وساعدنا على كل امورنا
ويارب الجميع يجيب احسن الدرجاااات واعلاها ويرزقكم يارب الدخول للجنه من اوسع ابوابها

آمين

تحياتي
نبض قلوبكم