هل الطب انتحار؟؟

[Dr.DeDe]

السلام عليكم ورحمة الله وبركاته
انا من طالبات سنة اولى .. تصوروا بس اولى وتسأل هالسؤال
وش بقيت للسنوات المتقدمة ؟؟
بس حبيت اعرف هل شعورك مثل شعوري ؟؟ لو كدا باحول

**************

مادري ليش حبيت اطرح هالموضوع ؟؟ وليش اخترت هالمسمى ؟؟
انا باسميه انتحار .... لأنه بصراحة انتحار من نوع ثاني
كلمة انتحار لما تنطرح .. على طول يجي ببالك موت ... صح ؟
و موت .. معناها حاجز بين الميت .. والدنيا .. وهو لو فرضنا مثلا التراب


اوكي .. ارجع لموضوعي ... وش دخل الطب في الانتحار ................
ما اعرف بس بصراحة بعد دخولي و دراستي للطب بجد صرت افكر بانها انتحار
بس من نوع ثاني .. فطب معناها مذاكرة .. ولا ويقولون .. ما تشوفين شي غير الكتب
يعني حاجز يفصلني عن الدنيا بالكتب ...


يعني حالي من حال الميت ... باختصار شديد
وصلنا لعامل مشترك بين الموت و الطب
اللي هو مسمى انتحار ....


هاذي بصراحة .. حالتي النفسية .. والضغط اللي بالقاه في بيتي .. ومتأكدة بأي بيت فيه طالبة طب

اللي باوصله بطرحي للموضوع ... بس اني خرجت مثل ما يقولون شي ضايق بصدري
ما اقدر اطلعه بالبيت الموقر .. لأنه وراه ذبحة رقبة ههههههههههه


قلبي ما عاد يستحمل بصراحة .... لكن السؤال .. هل كل التخصصات لازم لها اجتهاد شديد كالطب ؟
او هل طب .. يعني بس كتب وعدم اكتراث للمحيط الخارجي ؟؟

[Dr_amorous]

Dr_dede
الطب قسم ليس بالهيين إذا كنت أن تكوني من المتميزين لكن إن أردت النجاح فقط فيمكن أن تذاكري ليلة الإختبار وتأتي بال 60% وتريحي نفسك لكن أسمي هذا النوع من الطلاب بالفاشلين وليس لهم هدف

أنت عندما دخلت كلية الطب على ما أعتقد أنه رغبة منك وليس إجباريا فإذا كنت كذلك فحاولي أن تجعلي من هذه المواد قراءة متعه كقراءة كتب خارجية (هذا ما جعل الغرب يتقدمون )ولا تجعليها كتب مفزوضة عليكي
أعرف أن هناك مواد (ثقيلة دم شويه) لكن هي حاله نفسية بيدك الخروج منها
أما عن التسلية وأنني في سجن فلا أعتقد ذلك فكما أنني اذاكر فإني أروح عن نفسي دائما فمثلا يوم الأربعاء عندي لا أمسك فيه كتاب أبدا سواء كان عندي إختبار أم لا
كما قيل(روحوا عن القلوب ساعة بعد ساعة)
وأني لا أعتقد أن هناك طالب يستطيع المكوث أمام الكتاب دائما دون الإختلاط بالجو الخارجي والتنفيس عن النفس


ولسه إنتي سنة أولى ماشفت تانيه وتالته وبس بعدها ترتاحي إن شاء الله
روحي دحين أشربيلك كابتشينو ورويقي أعصابك واتفرجيلك فيلم ممكن كمان

[dr_zara]

hello dr_dede


اولا و بصراحه الموضوع عجبني كتير
ولأنه كتير من الطالبات اللي كانوا في سنه اولى او ممكن تلاقي ناس فيي حالتك يسألوا هدا السؤال (انا اشلي واشل الطب؟) :sad:
وانا متاكده انه 50% من البنات (انا مادري عن الأولاد)سألوا السؤال هدا وجلسوا ندمانين على انهم دخلوا الطب
:waa:
وبصراحه اقولك على شي
كتير من البنات لمن يتخرجوا من الثانويه و بأمتياز يستخسروا النسبه العاليه اللي جابوهافي الثانويه في اي قسم تاني ويقنعوا نفسهم انهم يدخلوا هدا المجال وللأسف سمعت وشفت كتير منهم سحبوا و مانجحوا في الطب من اول سنه وجاتهم حالة اكتئاب:?:
تعرفي ليه لأنهم ماخططوا من اول وماكان اصلا طموحهم طب ولا وجه الطب هدا كله بس عشان النسبه!!!!!!!
الشي التاني
انه في بنات خططوا لمستقبلهم من البدايه وفكروا بعقلهم الواعي
واجتهدوا وجابوا نسبه اللي تأهلهم لدخول الطب وهدا النوع اللي من جد يستحق انه الواحد يفتخر بيهم لأنهم فكروا من البدايه وخططوا مش زي النوع الأول . :eye:
والنوع التالت اللي دخلوا غصبن عنهم يعني مو برغبتهم (برغبة امهم و ابوهم):O: وهدا النوع اللي يفكروا بالأنتحار واتمنى انك ماتكوني منهم:LL:

هده نماذج اللي يدخلوا طب
وشوفي انتي اية نوع منهم
واذا كنتي غير كده قوليلي
وعلى فكره حالة الأكتئاب اللي انتي فيها ترى عادي وكلنا مرينا فيها بس اتمنى انها تروح عنك قبل اختباراتك:2:
عشان تذاكري بنفسيه مفتوحه
وترى الفشل مش يعني السقوط بل بالعكس ممكن يكون دافع لكي في هذه الحياه على تكملة اللي بدأتيه بطريقه أفضل
ولا تفكري في موضوع الأنتحار هدا لأنه مايستاهل
وشدي حيلك وربنا يوفقك
معليش يمكن طولت عليكي في الرد بس ان شاء الله تكوني استفدتي
:ws:
واذا كنتي تعاني من اي مشاكل او بغي اي استفسار ترى انا في الخدمه
بس بليز شيلي من راسك فكرة انتحار لأنها مو حلوه
:hp:

and good luck

DR_zara:12:

[reda0007]

تحياتي د. ديدي على فتح الموضوع
لأنو محد راح يفهم الموضوع هدا من جد إلا طلاب الطب الماسكين وطالبات طبعا
:O: :sad: :waa:
ههههههههههههه بعدين عفوا ترى سنه اولى مو دلع اقدر اسميها سنة الفضاوه
تعالي شوفي تالته هههههه والله موت
تعرفو اصلا مره قرأت بيت شعر لعمر بن عبدالعزيز يقول
قد جاء شغل شاغلا وعدلت عن طرق السلامه
ذهب الفراغ فلا فراغ لنا إلى يوم القيامه
كدا بالظبط هو دا الطب ذهب الفراغ فلا فراغ لنا إلى يوم القيامه

انا صحيح دخلت الطب ولكن كنت احسب إني راح الاقي فراغ ممكن امارس في هواية معينه او حتى اقرى في اي مجال علمي مثلا علم نفس ولكن فييييييين
بصراحه كل سنه اولى وثانيه وثالثه لا تقارن ببعض بل كل سنه ترفع مستوى الكرف عند الطالب او الطالبه لدرجه يظن انه لا يوجد كرف في الدنيا اكتر من الكرف اللي بيكرفو ولكن هيهات
فالبنسبه لمستواي في السنه الثالثه لا اظن انه ممكن ان يوجد كرف او تعب او قلق او قلة نوم مثل ما نحن فيه
طلاب السنه الثالثه مهمومين في كل الأوقات
لدرجة اني لا اظن انه يوجد طالب يذاكر جميع المواد ويعرف ما فيها بل الطناش هو صديقنا الدائم
فمذاكرة نصف المواد مذاكره جيده احسن من القراءه بلا فائده
بصراحه افكر احيانا انا والاصدقاء , كيف صابرين على كدا إحنا ؟ إش رأيكم نشتكي ؟ ولكن الشكوه لله
ولا ادري إن كان ما ينتظرنا في السنوات التاليه هل هو اصعب من ثالثه ؟ هل هو ؟

بصراحه اتصور ان الكليات الأخرى ليست بالصعوبه هذه او انهم لم يتعودوا على مستوى الكرف الذي نحن فيه
وعموما قد تكون طبيعة المواد عندهم تختلف والمطلوب منهم معرفته اقل بكثيييييييييير

ولكن احب ان اذكر هنا انني مع جميع طلاب الطب والطالبات بإختلاف مستوياتهم ولكن
الحاصل هو ان الطلاب يصلو مثلا بأي شكل للسنه الثالثه
وهنا تذهب سنوات العمر او يصارع الطالب ليحاول إجتياز هذه المرحله بأي شكل
وإن حصل فقد تكون النهاية في السنه الرابعه او الخامسه إن لم تكن في الثالثه نفسها
تسألوا هل تحصل اقول نعم
ونسمع عنهم ونعرفهم, الله يعينهم ولكن إنشاالله إنهم استفادو من سنوات الدراسه ولم تذهب هباء
فإختيار دراسة الطب ليس بالهين ولكن الله يعين الجميع

وإن انتهينا إلى صعوبه الطب ومشقته ولكن اذكر هنا انه لا يوجد شيئ إسمه مستحيل
يعني الدكاتره هادولا اللي مملين الدنيا كيف وصلوا لكدا
نلاحظ جمييييييعا انه في نهاية السنه ان الذي ذاكر وجاهد هو الذي حقق النتايج الطيبه وفي السنه الثالثه اللي ذاكر وجاهد هو اللي نجح لأنه لا يوجد ما يسمى نتايج طيبه في تالته :LL:
ههههههه لا تخافو الحقيقه انه فيه ولكن في الأحلام التي تسبق الإختبار
فالدعوه سهله والسنين تمضي ونتخرج جميعا إنشالله ولكن اهم شي هو إحتساب الأجر في المذاكره
والله يوفق الجميع وآسف للإطاله

[dr_mido]

السلام عليكم ورحمة الله وبركاته

اما بعد

د ديدي

الطب وباختصار

قبل ما تكون مهنة عملية

فهي مهنة اخلاقية

فيجب على الطبيب ان يدرس من اجل ان ينمي قدراته على معالجة المرضى

وليس من اجل المادة او الشهرة

و انا بنظري لا أسميه انتحارا بل أسميه

تضحية من المرتبة الاولى

لأنه كان بإمكان الطبيب ان يختار اي قسم ثاني و يريح نفسه

لكن بتعبه وجد وسهره

فهو يضحي من اجل

غيره


اخيرا


الطبيب كالشمعة

يحرق نفسه

ليضيء للآخرين


:12:

تحياتي

مشرف القسم

ميدو

[WaLeeD]

:12: :12: :12:



امممممممممممم

الحقيقة يا دكتورة ديدي ويا دكتور رضا انو انا ما شفت اكثر منكم تشاؤما

صحيح انو الطب صعب وخاصة سنة تالتة يا دكتور رضا ولكن ما هو مستحيل

يعني انا قصدي انو الواحد لمن يستصعب الحاجة هي تصير صعبة حتى لو كانت سهلة

عذرا دكتور رضا لكن كلامك عن الفراغ غلط

لأنو من جد عندنا وقت فراغ طيب نقدر نتسلى فيه حتى لطلاب سنة تالتة

انا عندي سؤال ؟

يعني الواحد فينا لمن يرجع من الجامعة كم حيذاكر في الايام العادية ؟

مستحيل أكتر من ساعتين هادا اذا كان مرة شاطر ماشاء الله

طيب والوقت الباقي ايش حيسوي ؟؟

صح كلامي يا شباب والا لا

دكتور رضا

انت ماشاء الله خلاص عديت يعني ما بقيلك الا نص المشوار وهو أسهل لأنو معظمه عملي

ربنا يعينك

لكن اوجه كلامي للدكتورة ديدي

يا دكتورة ايش شعورك لمن واحد يقللك دكتورة ؟؟؟

انا برضه العام الماضي كنت في نفس الموقف هادا والحمد لله مرينا والآن نحن سنة تانية

يا دكتورة اللي يقللك انو الطب انتحار هو أصلا ما هو متحمل انو يشوفك دكتورة

اعتقد فهمتيها صح ؟؟

نصيحة فقط اعتبريها من أخ لكي اكبر منك ومر بالموقف هادا

دايما اذا تشوفي نفسك متضايقة ومهمومة من المذاكرة

فقط ارتاحي وسيبي المذاكرة وبعدين فكري في الحاجات الحلوة اللي تنتظرك قي المستقبل

فقط تخيلي كيف لمن حتجيكي وحده مريضة ومهمومة وبعدين تخرج من العيادة عندك وتقول

صحيح انو الحياة حلوة



صحيح يا دكتورة

الحياة من جد مرة حلوة ونحن نبغى نعيش الحياة هادي ونبغى نحب فيها ونتعامل مع الناس بمحبة وعطف

وكمان نبغى نلعب ونتسلى فيها وكل الحاجات الحلوة اللي تولد السعادة

فقط اهتمي باللغة الانجليزية وتذكري ان الطب ليس انتحارا

وانما هو عبارة عن انقاذ حياة نفس من الموت قد تكونين انتي السبب في انقاذها بعد الله سبحانه وتعالى

اليس هذا احساس رائع تذوب امامه كل الصعوبات التي تواجهنا في دراستنا

الله يعينك ويوفقك في حياتك العلمية والعملية

آمين


:LL: :LL: :LL:

[Dr. MacabrE]

<center>


سمعت انتحاااااار؟؟

اش هذا

مين قال انو دراسه الطب صعبة ؟

صح مو بالسهوله
خخخخخخخخخخخخخ

لكن
dr.dede
اول شي اسمك عجبني

ثانيا لا تشيلي هم كل شي يهون بالنيه الصادقه والعزيمه القويه وشويه مذاركه


د رضا

فجعتني؟؟

تقول كرف وما ادري ايش انته صح دحين تحس انك مكروف
وان سنه اولى مالها داعي وفضااااااوة
تقول كذا طبعا لانك صرت فاهم ماشاء الله عليك

كلنا كذا
دحين انا باطالع في مناهج سنه اولى خصوصا في بدايه المناهج
احس انها تاااااااااااااااااااافه ليش؟؟ لاني درستها والحين باتوسع فيها

بالله طالع دحين في مناهح ثالثه ثانوي
وخذ كتاب الاحياء او الكيمياء مثلا واقرا

تحس انها تفاهه لابعد درجه بس اتذكر لمن كنت سنه ثالثه ثانوي
شوف اش كنت بتسوي؟؟
اكيد مذاكره وملخصات واجتهاد وغيرو

لاننا مع الايام ننضج اكثر ونصير نفهم اكثر

اوووووووه نسيت د ديدي

ارجع للموضوع

شيلي كلمه انتحار من دماغك
وكلمه صعبه ومستحيله من قاموسك

وتوكلي على الله

وذاكري وزي ما قلت لك قبل لا تشيلي هم

يعني لو كل ةوحده باقول كذا من فين نجيب طبيبات ؟؟
من يداوي نسائنا؟؟

شوفي انا مثلا

الحمد لله ماشي حالي في الدراسه
وما حرمت نفسي من هواياتي
(( غطس - سباحه - ولو فيه قفز حر))
واهم شي الكمبيووووووووتر هذا عشيقي الوحيد
ما اقدر استغني عنه





وان شاء الله نلحق بزملائنا الاطباء اللي قبلنا

وحكايه التعثر والتحويل هذي نصيب

وان شاء الله نشوفك من الاوائل





تحيااااااااااتي

[Dr.wrood2004]

عزيزتي دكتورة ديدي...
الاخوة الدكاترة ما قصروا ما شاءالله عليهم ...
اهم شيء لا تضغطي على نفسك ...
ونصيحة انا ما عرفتها غير متاخر جربتها واستفدت منها كثير
انتبهي تماما مع الدكتور في المحاضرة وحاولي لما ترجعي البيت مجرد انك تقرئي المحاضرة وصدقيني ما راح تحتاج منك بعد كدة وقت في المذاكرة (لانك لما حترجعي البيت حتكوني لسه فاكرتها وفاكرة كلام الدكتور فما عليكي غير تثبتي المعلومات ) واذا فيه شيء ما فهمتيه على طول اسالي لا تستحي (لا حياء في العلم) صح ولا لا؟؟؟؟
بس كلمة انتحار....
ماني معك فيها
يمكن تعب ارهاق
لكن مو انتحار:)
الله يوفقك ويوفق الجميع ونشوفكم دكاترة تشرفوا البلد وترفعوا راسها باخلاصكم وتفكيركم الراقي
دمتم راقيين دائما
====
2004

[reda0007]

تحياتي للدكاتره ليدو ومكابري
مشاركاتكم معقوله جدا ولكن
اقول لأي احد يظن ان الطب سهل ويسير ومن السهل الأخذ به
اقول له وبالفم المليان............. سلملي على البدنجان

حين تكلمت عن الفراغ بالطبع لم اقصد ايام الإجازات او عطلات الأعياد
إذا كان الطالب يقضي اكثر من 35 ساعه اسبوعيا في الجامعه اين الفراغ؟
وإن كان الطالب يبحث عن النجاح في الماده من غير معرفة تفاصيل الماده
فهل هذا طالب بتطلع للتعامل من النفس البشريه

اعتقد ان صعوبة الطب هي نابعه من ان الطالب شخصيا مطالب بمعرفة كل ما يوجد في الكتب اللي تتعلق بعمله سواء كانت المعلومات قد شرحت من قبل الدكاتره او لأ وهذا ما يحصل في الإختبارات

وإذا سوف يقضي الطالب 7 سنين في الكليه حتى يتخرج في ظل هذه الظروف
وكثير يقضي اكثر من ذلك
فأستطيع ان اقول
ان الداخل مفقود والخارج مولود
ولو ترجعوا لسطور مشاركتي السابقه تجدو اني ذكرت انه لا يوجد المستحيل في قواميس طلاب الطب

[Dr. MacabrE]

<center>

اخت ورود

انا ما قلت ان الدراسه سهله

بل قلت ليست مستحيله

اما الفراغ
طيب انتي تقضين 35 ساعه اسبوعيا بس من اصل كم ؟؟
24*7= وين الاله وينهاااااااااا ايه ايه الجوال 168 ساعه

طيب لنقل ان التوم ياخذ ثلث الوقت يعني 56 ساعه

كم يبقى؟؟

168-56-35 = 77

اي معدل 11 ساعة يوميا

لنقل ساعتين او ثلاثه للدراسه في الايام العاديه يبقى 8 ساعات

لنقل ساعه للصلاه يبقى 7 ساعات

7 ساعات فراااااااااااااااااااااغ يوميا!!

اش الواحد سوي؟

يمديه يألف كتااب




فيه وقت فرااااااااغ مو ما فيه
بس انا انصح انو الواحد سيتغله في قرءاة كتب مفيده






سلامتكم

المفروض يدخلوني رياضيات لكن نصيب!!
خخخخخخخخخخخخ

[reda0007]

ههههههه اولا انا مو اخت انا اخ
:122:

بعدين إنت عندك 11 ساعه يوميا ما شاالله والله شي حلو
اجل على كدا إنت ما تاكل او تروح للجامعه بسرعة الضوء او حتى تتخلص من الفضلات عن طريق التنفس هههههههههه معليش بس من جد

والله انا عندي الساعات الموجوده للمذاكره الفعليه في غير ايام الإختبارات لأن ايام الإختبارات حاله خاصه
هيه ساعتين بالكتييييييير
فأنا انصح الجميع بتأليف الكتب وقراءة الكتب المفيده في خلال هذه الساعات كلا على حسب ساعاته
:85:

[Dr.DeDe]

سلام

والله ردودكم ريحتني كثييييييييير
كان ودي اعرف شعور السنوات المتقدمة


عموما انا ابدا ماني محطمة جدا .. لأ في امل لأرفع معنوياتي .. هي حالة مرت فيني من ناس
الله يسامحهم ويهديهم .. اما الطب فهو حياتي .. ولا ما كنت دخلته اساسا
جربت تحطيمات المواد اللي بناخذها
والله مواد ماهي بسهلة ... وغير كدا على سنتنا غيروا النظام فيها
قصدي على الانجليزي ... اما بالنسبة للمواد التانية فما عليها كلام
كله اخذناه بالتوجيهي والثانوي .. بس الانجليزي عقد بصراحة
وغير كدا توحيد الاسئلة في النصفي والنهائي مع الشباب معقدني بصراحة
لأنه ما عندنا النوتس اللي معهم .. حتى الفسيولجي بطلت الدكتورة من النوتس
انشالله بس اعدي من هالسنة
و نتقابل معكم في المستشفيات
عموما انا ما بادفن نفسي بالكتب طول الوقت
بس انشالله اكون طالبة مجتهدة .. وطبيبة ناجحة


واشكركم على ردودكم .... اللي بصراحة رفعت معنوياتي كثيييييييير
تحياتي

[dr_messo]

<center>

مرحبا

اخت ديدي


اولا مرحبا بك عضوه جديده في اسره المنتدى


والان انتقل الى موضوعك


انا ممن دخلو الطب عشقا وحبا وامنيه

وبالفعل

واجهت الكثير من الصعوبات


وفكرت احيانا في ترك الكليه واحيانا اخرى لماذا ادرس الطب واتعب نفسي دا كلو


مش كان دخلت اي كليه وريحت بالي




لكن

وبعد ان بدات افكر بعقل اكبر وقرأت كتب راااائعه في النجاح وتطوير الشخصيه


اختلفت طريقه تفكيري تماما

اصحبت استمتع بدراسه الطب


مهما كانت
:LL: :LL:

فعلا استمتع


نصيحه لكي


فكري من اليوم في التخصص الذي تحبي ان تكوني فيه بعد التخرج



وكل صعوبه تمر عليكي



اغلقي عينيكي

لدقائق


وتذكري مكانك بعد 10 سنوات

ومركزك وانت دكتوره بين الناس

والمرضى حولك

يطلبون مساعدتك


وانت تستمعين لدعواتهم لك


اقسم انه شعور اكثر من رائع

وسينسيكي كل التعب



وستعودين بروح اقوى واقوى

للاستذكار


وستعشقين الطب دراسه ومهنه


جربي راح تعرفي


لانو فعلا انا جربت


والان اعيش اسعد لحظات حياتي واستمتع بالصعوبات


لاني اعيش حلمي

وانا في طريقي اليه

بإذن الله تعالى


انا الان في السنه الخامسه


والحمدلله سعيد جدا

نصيحه دعيكي


ممن يقال لهم سارقي الاحلام

الذين يحاولون تثبيطك واضعاف عزيمتك


في الدراسه والتفوق

هؤلاء الذين ياتون اليك

ويقولون الدراسه صعبه

مستحيله

مميته

انتي ايش دخلك طب

لي رميتي نفسك

ليه وليه وليه


صعب مشكله ومش عارف ايه

صدقيني دول يزيدو همومك


ويدمرو طموحك


ابدا لاتسمعي ليهم ابدا

ابدا



وغير كدا

اياكي والتحجج واستخدام الاعذار لتبرري لنفسك الضعف او الصعوبه



لاتقولي غيرو المنهج

او صعوب المواد او او او

لانو كل سنه دي الاشياء بتحصل

ولو اقنعتي نفسك بدا الاسلوب كل مره


راح تتكاسلي وتقولي العيب مو فيا العيب فيهم ودي مشكله كبييييييييره



انتي بالعكس قولي حتى لو غيرو انا انسانه قويه وشاطره

واقدر اواجه اي صعوبه



عادي انا هنا عشان بدي اسير احسن دكتوره




ومحد راح يقدر

يوقف في طريقي ابدا



وانا مستعده احارب الكل



عشان اوصل

لحلمي



صدقيني ساعتها راح تكوني انسانه تانيه انسانه جديده


________



اتمنى اني ماطولت عليكي

لكن حبيت اقلك شويه نصايح من اخوكي الكبير

وان شاء الله تفيد في حياتك


وتدعيلنا


_________



انصحك بقرائه

كتابين رائعين راح يساعدوكي في تغير مجررى حياتك وتفكيرك



الاول : كتاب من حرك قطعه الجبن الخاصه بي

من اصدارات مكتبه جرير كتاب مترجم الى العربيه صغير ورائع جدا

يتكلم عن منهجيه التغير وكيف تتعاملين معه

انصحك جدا بقرائته انت وكل من في المنتدى

وهو احد اكثر الكتب مبيعا في العالم


والكتاب الثاني بعد ان تقرأي هذا الكتاب


اسمه

قوى عقلك الباطن

للدكتور جوزيف ميرفي


هذا الكتاب يعد من اروع كتب تطوير الشخصيه في العالم


_________

وساكتب موضعا عن هذين الكتابين قريبا ان شاء الله

:LL:


وفق الله الجميع


_______

ولو رغبتي في اي شي لاخجلي واسألي


وسيم

القائم على الموقع

[dafoor]

السلام عليكم ورحمة الله وبركاته

الشكر للأخت ديدي وكل من كتب في هدا الموضوع الرائع

أول شي أقوله أنك الآن ضروري ضروري لازم ترفهي عن نفسك

لأن أول ما الواحد يبدأ يفكر في مساوئ الطب

معناه أن وصل لمرحلة متقدمة من مرض يسمى
tafashism

و يحتاج لراحة وفترة استجمام


بس أقولك اتطمني
لأن هدي حالة طبيعية تحصل في فترة ما بعد المدتيرم


آسف انا مضطر الآن أسيب الموضوع لكن

ترقبوا موضوع عن فنون الدفرنة قريبا

لعله بخفف من أزمة الطفش المنتشرة مع هبوب الرياح المدترمية القادمة من المحيط الدراسي

[dr_zara]

hello again
ترى مافي قسم فيله دراسه سهله حتى الآداب لا قين صعوبات في دراستهم بس مو زينا
بس اهم شي لازم انك تكوني حابه القسم اللي انتي دخلتيه

وبس:hp: :LL: :hp:

[reda0007]

أعتقد ان الموضوع في نهايته بدأ يتجه في وجهة التحميس او التحفيز و التثبيط
ولم يعد يناقش صعوبات دراسة الطب وهو اصل الموضوع

ومن هذه الوجهه قد يعتقد البعض ان ردي الأول كان يطمح إلى التثبيط والتهبيط هههههه مثلا تهبيط السيارات
ووالله لم اقصد ذلك
ولكن كنت فقط اناقش مدى الصعوبات التي تواجه الطلاب والتي هيه غالبا ما تكون تحميس
مثلا
جميعنا عندما دخلنا الطب مثلا لمااذا ؟
انا شخصيا كنت اريد ان اكتشف مثلا لماذا يردد الناس ان الطب الصعب وان القبول فيه اصلا صعب
فكنت اريد ان اثبت لنفسي شخصيا انه مع صعوبته ولكن سأقبل بإذن الله وحصل
اتحمست جدا لدرجة اني انقبلت فيه فقط لإرضاء نفسي في الدرجه الأولى
والإنتظام في الدراسه جاء في الدرجه الثانيه
بل وكنت انتظر السنوات لأرى صعوبة كل سنه واقهر هذه الصعوبه بالتغلب عليها
وكل سنه يزداد الحماس عن السنه اللتي قبلها

فأتصور ان الطالب الفتك :s:
هو الطالب الذي يزداد حماسا حين يسمع بالصعوبه
صعب !.............. على مييييييين طلاب الطب :122:
طلاب الطب هم مروضيين الصعوبات
هذا ما احببت ان اذكره واشكر جميع المشاركين

[Dr.DeDe]

سلام ... والله حابة اشكر كل من رد على الموضوع
وكل من قرأه
اولا .... حابة ارد على ردك اخي الكبير الفاضل د.وسيم
والله ردك زاد حماسي في الطب
هي من ناحية الدراسة .. الدراسة صعبة بس مو الطب فقط
اكيد كل المواد ... بس مشكلة الطب .. سنواته كثيرة
دراسته بالانجليزي ... و ما اعرف ايش الصعوبات بعد
لأني لسه ما شفت شي ... انا لسه ببداية الطريق .. وانشالله اوصل لنهايته
اما من ناحية المنهج .. انا مو القصد اعيب في المنهج او شي
لأ بس .. لو مهدولنا شوي فيه ... مثلا مثلا مادة ال
comunication
مستصعبتها ... السبب اننا بنسمع شريط مريض بيشكي عن حاله
و حنا نكتب شاللي يشتكي منه
طيب .. انا اساسا ما سمعت مثلا بالمرض اللي بيشكي منه
بس عموما الدراسة بكملها .. شئت ام أبيت
كانت سهلة او صعبة .. لأنه هذا حلمي وبأحققه
وانشالله اصير مثلك سنة خامس .... من زمان باحلم بهالسنة اللي تكون دراستي
تطبيق في المستشفى .... الله يوفقك ويوفق الجميع
اما من ناحية .. شي اطلبه
والله ياليت لو طلاب سنة اولى لو قرؤا الموضوع
باطلب من اللي يقدر .. ينزل ال
notes
اللي ياخذونها .. في البايو او الفسيولجي
ولهم جزيل الشكر


وللجميع .. مشكورين والله على الردود اللي بجد رفعت معنوياتي
ولو قليل .... واذا ما علقت على ردودهم .. لأني ماني لاقية الكلام
المناسب اللي اشكرهم فيه

واقبلوا مني فائق التحية
وكل رمضان وانتم بألف خير

وانشالله ما يكون الموضوع ضايقكم .. بس من خلاله حبيت اعرف
هل شعور السنوات المتقدمة نفس شعوري
اما نت ناحية شعوري و الانتحار
انشالله يكون تغير .. ولكم الفضل فيه




تحياتي

[dr_messo]

<center>


شكرا لكي

طبيبه المستقبل

دكتوره ديدي


وربنا يوفقك ويوفق الجميع


وان شاء الله يكون المنتدى وسيله للتواصل بين

الكل


ويفيد الجميع يا رب


:SS:

[dr_messo]

<center>


سيتم نقل الموضوع


الى قسم

general discussion


لانه هو المكان الانسب


:455:

[H@SSOOM]

هممممممممم

احب انوه على شغله بسيطه

وهي انه خلاص انتي دخلتي طب بغض النظر عن الطريقه والسبب وليش

المهم


انتي الان دكتوره



صحيح عليكي مهمه كبيره لكن مش مستحيله



وبالعكس الطب ماهو انتحار ولا شي


بس انت على فكره مكبره الموضوع شويه

وهذا مو في صالحك

اتمنى انك تغيري طريقه تفطيرك

وتتفاءلي


وتخوضي التجربه بنفسيه مرتاحه


وانشالله موفقه

ونشوفك دكتوره يا رب:hp:

[د.الفارس]

:hp: راح انزل موضوع اتمنى تطلعي عليه

تحياتي لك

د الفارس

[dr_zara]

السلام عليكم
أضافه الى الكتابين اللي قلهم الدكتور ميسو احب اضيف كمان ثلاثه كتب تانيه وبصراحه انا قرأتهم واستمتعت بقرأتهم وماأخبي عنكم انها رفعت من معنوياتي اكتر واكتر
اول كتاب اسمه (العادات السبع للناس اكثر فعاليه )من مكتبة جرير
هدا الكتاب بالفعل كتاب ممتاز للمؤلف ستيفن كوفي
وانا عن نفسي اخدته كورس في جده مع الأستاذ الفاضل زياد ابو زناده لو سمعتوا عنه
بالفعل خرجنا من المحاضره ونحن كلنا متفائلين جدا واتغيرت نظرتنا للحياه بشكل تام أنصحكم انكم تاخدوا الدوره او تقرأوا الكتاب لأنه مهم بالنسبه لنا كدكاتره
والكتاب هدا يعلمك كيف تكون highly effective doctor

الكناب التاني (في الحقيقه هو ماهو كتاب ) مجموغة كتيبات صغيره تحت عنوان سلسلة الكتاب الصغير
ل بول ويلسون وبنيلوبي ساك
كتب صفيره الأول عن الأمل والتاني عن المتعه والتالت عن الرفاهيه والرابع عن العنايه بنفسك
كتب صغيره يسهل عليكي حملها في كل مكان وزمان
انا جربتها وبالفعل مفيده
الكتااب التالت اسمه أساليب الهدوء ل بولل ويلسون
كلها من مكتبة جرير
هدا الكتاب يعلمك فن الأسترخاء
عندي حاجه كمان لو اي احد سمع بدورة الترجمه اللغويه العصبيه او (NLP)
مع الأستاذ الفاضل علي شراب
اتمنى انه يحضرها لأنه وبالفعل دوره ممتعه (هي صح تكاليفها غاليه )بس حتخرجي منها وانتي في قمة السعاده وما راح تندموا لأنكم حضرتوها
وشكرا لكم


DR_zara

:hp: :LL: :hp:

[WaLeeD]

:12: :12:

الحقيقة وكالعادة دايما آتي متأخرا

ولكن أن تأتي أحسن من أن لا تأتي صح؟؟

الحقيقة أعزائي

في ردي هذا لن أضيف على ما قاله الجميع عن الطب وهل هو انتحار

ولن أنصحكم بقراءة كتب النجاح في الحياة

فالأطباء ميسو وزارا لم يقصروا مع أنهم نسوا الكتاب الأعظم الذي تطمئن به القلوب

كما قال تعالى ( ألا بذكر الله تطمئن القلوب ) صدق الله العظيم

ولكن أحبتي بعد أن استأذن عزيزتنا الدكتورة ديدي

أحب أن آخذ الموضوع الى منحنى آخر

ممكن تسمحيلي يا دكتورة ديدي؟؟؟؟؟ آوه شكرا جزيلا

احممممم

شباب : الحمد لله خلاص كلكم مقتنعين انو الطب مو انتحار تمام ؟؟

يعني هذا الشئ مفروغ منه خلاص ، بعني دحين نبدأ في الإبداع في الشي اللي حبيناه صح؟؟

لكن القمة ياشباب أنو مع إبداعنا في تخصصنا نكون برضه مبدعين في شئ آخر

multi purpose person بالإنجليزي يعني

ابغى أسالكم جميعا أعزائي

في ايش تحب تكون مبدع إضافة الى إبداعك في تخصصك الأول الطب ؟؟؟؟؟

للمعلومية

كلكم تعرفوا سقراط اللاعب البرازيلي المشهور الذي سبق بيليه

هذا اللاعب كان طبيبا

وأيضا ملكة جمال العالم لعام2000الهندية اديتي كويترا

عندها بكالوريوس طب وجراحة

ولا نتسوا الكولومبي ماتورانا مدرب الهلال

هو طبيب أسنان على قول المعلقين الله أعلم

حبايب كلهم هادولي كفار

احنا المسلمين ونفوسنا مرتاحة أكتر منهم نقدر نصير أحسن منهم صح شباب والا لا ؟؟؟

:LL:

تبغو تعرفوا انو مبدع في ايش ؟؟؟؟

احمممم

انا أقدر أسوي شاي وأقلي بيض وممكن أحرقه كمان

:K:


صراحة انا مبدع في اللغات اتكلم 3 لغات كويس

واللي بيغى يعرف مني حاجة عن نفسي هادا ايميلي

wimiy@hotmail.com

آوه نسيت شباب أنا برضه حافظ القرآن الحمد لله

كلامي كتير شكلكم نسيتوا السؤال

في ايش تحب تكون مبدع إضافة الى إبداعك في تخصصك الأول الطب ؟؟؟؟؟

ارجو منكم أن تشاركوا بصراحة


:LL:

مع ألف سلامة وعافية وهنا

[Dr.DeDe]

تحياتي لأطباء المستقبل الأعزاء ...
والله شباب ما قصرتوا ... كان ردكم عن جد مقنع
و من ناحيتي .. ارتفعت معنوياتي .. وانشالله ابدأ اذاكر بنفسية مفتوحة
والدكاترة .. د. وسيم ... ود.زارا
مشكورين اطبائي الفاضلين على الكتب .. وانشالله اقرأهم و تتغير فكرتي تماما ونظرتي للحياة
واحاول اشيل التشاؤم من قاموسي


الدكتور الفاضل ... Dr.Ledo
مشكور على الرد .. و على التواجد
وبالمناسبة .. الكتاب اللي نصحتني فيه من اروع الكتب ... ولله الحمد
اهو الكتاب الوحيد اللي يفك ضائقة اي شخص تعبان نفسيا
اما من ناحية الابداعات المصاحبة للطب
حلوة الامثلة اللي عطيتنا اياها

اما من ناحيتي احس انه ناحية الابداع عندي غير اني انشالله حابدع في الطب
كتاباتي .... شعر او خاطرة


ومشكورين شباب على التفاعل .. وا رجع اكرر
انشالله ما يكون الموضوع ضايق اي احد فيكم


تحياتي :12:

[WaLeeD]

:O: :O: :sad: :sad:

ايش هادا يا شباب

ليه 3 ايام منتظر الابداعات

بس شكله ما في احد عنده ابداع غير ابداعه في الدوفرة


هيا شباب ورووونا الابداعات اللي عندكم والا تبغوني اجيبلكم عروض

:87: :87:

[dr_messo]

<center>

دكتور ليدو


من رأيي ان تطرح موضوع الابداعات في مجال مرافق للطب في موضوع جديد


وسيكون النقاش هناك امتع حتى لانخرج عن صلب هذا الموضوع




وحتى نتبحر في الموضوع الاخر

[WaLeeD]

شكرا دكتور ميسو


كلامك صحيح

ان شاء الله حأنزل موضوع زي هادا


:LL:

[ana_dr_romance]

مساء الخير وصباح الخير للكل
حبيت احي اللي كتبت الموضوع وقالت رأيها بصراحة
والناس المتفاعلين في الموضوع
والشي الي انتي حسيتيه يا ديدي
نفس شعورنا كلنا لمن دخلنا الطب
بس انا بغيت اوضحلك اشياء يمكن انتي ما فكرتي بيها
انتي دخلتي طب وانتي دحين يعني في دا الوقت عز التقدم والتطور يعني
لو كنتي طالبة طب من قبل مية سنة
يعني من قبل مية سنة مافي دكاترة
ليش ماقالو زيّك
وليش ما اتضايقو منك وصارو دكاترة وناجحين
يعني هم ناس من الفضاء جايين
كلهم بشر واحنا بشر
هادا من جهة

من جهة تانية يا دكتورة
مشكلة الطب عندنا احنا
الانجليزي
يعني لو كان اساسنا قوي في الانجلش كان ماحتجتو انتو لدروس الكوميونكشن واللي انتي تقولي عنه
يعني هادا يرجع لنفس المدرسين والمناهج الي درسونا
في الثانوية
لانه صراحة منجد لو سألتي واحد في توجيهي محا يعرف ايش ميوله وايش يبغى
وهنا في البلد هنا في السعودية
مستقبل الواحد تعتمد على نسبته وهادا اكبر غلط
ويتخرج من الثانوي وهو مو داري
والواحد ما يعرف ايش هوا يبغى بالزبط الا بعد البكالريوس
وانا اعطيكي مثال
صاحبة اختي متزوجة من واحد ناجح في عمله ماشالله عليه
بس انتي لو تشوفي سيرته الذاتية
اول ما تخرج من الثانوي دخل اصعب قسم اللي هوا الطب
ونجح في الطب واخد شهادة
وبعدين علقها
ودخل ادارة اعمال
ودحين ماشالله عليه
سنه قرب الثلاثين
وبياخد راتب بيوصل ل 40 الف
قوليلي بالله الدكتور متى بياخد 40 الف

والحكاية مو حكاية فلوس
الحكاية انو انسان دخل اصعب قسم وبعدين عرف ميوله فين
واشتغل ودرس
واديكي مثال تاني
اختي اتخرجت من جامعه الملك عبدالعزيز وتقديرها ممتاز في برمجة الحاسب الالي
وبتشتغل دحين
في شركة فوكس للدعاية
وتصميم اعلانات للشركات
يعني شي مختلف تماما عن الشي اللي درسته
يعني هيا اخدت الشهادة واتعلمت وكملت دراستها في دورات واشياء تانية واشتغلت
وشغلها نايس ومبسوطة فيه والحمدلله

المهم
خلينا نفكر في اللي عندك دحين
ترى يا دكتورة
سنة اولى طب مهي مقياس للطب
ولا المعلومات اللي تاخدوها هيا الطب
ومهي بهادي الصعوبة
ولو شفتيها تلاقيها كلها معلومات اخدتيها مع بعض التوسع نفس توجيهي بس زيادة في كم مادة
والمشكلة الاساسية انجلش
وصدقيني لمن تكبري وتصيري سادسة وتصيري دكتورة في الانتيرن
حتضحكي على كلامك اللي انتي بتقوليه
اهم شي في سنة اولى طب
انو تعرفي تتكلمي انجلش
وهادا الشي مو بس بالدراسة
اتفرجي افلام اجنبية وشوفي مسلسلات اجنبيه
واتعودي على الكلام الانجلش وحاولي تتخاطبي ب اللغة هادي
مع زميلاتك في الدراسة وحتى في البيت
ومنجد الحق
صعوبة سنة اولى كمان في الحفظ
يعني تحفظي معاني الكلمات كانك في ترجمة
وما اقول انها سهلة
بالنسبة ليا انا سهلة
بس لكم انتو يا طلبة اولى صعبة وانا عارف الشي دا
اهم شي الراحة النفسية وتسوي شي وانتي مقتنعه بيه
وطلاب كل سنة يقولو انو سنتهم اصعب
وهادا الشي في الطب معروف انوكل سنة اصعب من الي قبلها
بس كمان الحق
سنة تالتة كان فيها معلومات كتير
وسنة رابعه صعوبتها انو كيف تتعامل مع المريض واول سنة كلينك
امممم

انتي لا تفكري في شي حيصرلك في السنوات الجية

انتي اللي عليكي تفكري في اللي انتي فيه
زي المثل الي بيقول
اللي يطالع فوق كتير رقبته تعوره

واذا عن الملخصات قوليلي انتي ايش تبغي اية ملخصات وانا اعطيكي هيا
هوا ولد خالي برضو في الطب سنة اولى
اظن في موقع صاحبنا احمد منزل الملخصات
ماادري صراحة ماقد دخلته
هههههههههههههههههههههههههه

امم بالنسبة للمحاضرات
في المحاضرة لا تكتفي بالسماع بس
من دحين اتعودي انو انتي تكتبي النوت والكلمات اللي بيقلها الدكتر او الدكتورة في نوتز صغيرة
واتعودي انو انتي تشيلي نوتز صغيرة يعني
note pad
تكتبي فيها اشياء صغيرة
hintsيعني

وترى الطب حلو
وحتشوفي حلاوته في سنة رابعه
والغلط عندنا في الكلية انو مافي شي اسمه
اورينتيشن
يعني ياخدو طلاب وطالبات سنة اولى او سنة تانية وسنة تالتة يوروهم يعني ايش مستشفى
وليش تدرس المادة هادي
واول تلات سنوات كلها زي المدرسة
بس انجلش
والمفروض هادا يكون لتالتة بالتحديد في اول السنة واول ما يدخلو مادة
المفروض يوروهم ايش اهمية المادة هادي في المستشفى
علشان الواحد يحس
ويعرف ليش بيدرس هادي المادة

واتمنى انو انتي تكوني علاقات مع طالبات اكبر منك في نفس السنة وهما يوروكي ويقولولك وزي كده الواحد يتعلم من اللي اكبر منه

وصراحة المنتدى هادا مشكورين مرة كتير على اللي سووه
لانهم يخلي الواحد يتنفس وطريقة اتصال وكونكشن
وكل واحد يقول اللي في خاطره ويعرف ايش رأي الي اكبر منه

وربنا يعطينا على قد نيتنا
وربنا يوفقكم ويوفقنا

وان شالله نصير زملاء في المستشفى وبالتوفيق للكل

thanxxx 4 reading

regards,
RomantiCCleveR