هدف حياتي

[RoRo0o0o]

بسم الله الرحمن الرحيم

كتير مننا عايشين حياتهم على هواههم.... بدون هدف
ماهم مدركين هم ليش عايشين
واذا سألت احد منهم ..



يقولك : والله انا عايش عشان ادرس وبعد ما اخلص من الدراسة اشتغل وبعد ما احصل فلوس , اتزوج واربي اولادي واصرف عليهم



طيب

وبعدين

ايش تسوي


فيقول: اهم شي اني اربي اولادي احسن تربية عشان يدخلوا احسن جامعات


طيب ... وبعدين



فراح يقول: خلاص ..ايش ابغا اكتر من كده



هذي وجهة نظر اكتر الناس

وهذا حلو

بس ايش هدفه من هذا كله



فحيقول .. زي الناس .. الناس ليش عايشين.. عشان كده بس


طيب ... هم ايش سووا في حياتهم
قصدي ايش غيروا
ايش انتجوا

ما كان عندهم هدف

يا انهم يكونوا تابعين لغيرهم او يكونوا مقلدين غير واعيين باللي يقلدوه

ايش الهدف من دا كله


فليش ما نكون احنا غير .....غير عن الناس هادولي
ليش ما نبدع ونجدد
وماتكون حياتنا روتينية
ونحدد لنا هدف



هذي الفكرة طرأت على بالي وحبيت اشارككم فيها
وابغاكم تشاركوا معايا

بس مو بس بالكلام في المنتدى
ابغا شغل وفعل


ابغا اننا احنا طلاب وطالبات كلية الطب وكلية العلوم الطبية و كل التخصصات الطبية وغير الطبية
بجامعة أم القرى
نتحد كلنا مع بعض
وننتج ونغير في كليتنا ومدينتا وبلدنا وامتنا
نسوي شي ونرفعها فوق

ونحاول نتغلب على الصعاب اللي بتواجهنا واللي حــتواجهنا
سواء من الجامعة او من اللي حوالينا

فيا ليت تكتبولنا وتشاركونا بأهدافكم
عشان نحاول نشجع بعض ونوقف ونساند بعض
لأنو بدون مساندة او احد واقف جنبك ...حتحسوا بضعف وهوان من فترة لفترة

(لأنو وبتجربة شخصية حصلتلي ...لولا الله ثم حبيباتي بقية الـ
Cheer Up Team
وأهلي اللي وقفوا جنبي
كنت ضعفت و...... بس الحمد لله)

وانا اول وحدة راح اشارككم بأحد أهدافي...
احم احم
لحد يضحك

انا اطمح اني اكون من أحسن الناس خلقا وأدبا وعلما وأحسن طبيبة في الدنيا
وأكون في منصب عاااالي عشان اقدر من خلاله أغير في المجتمع وفي حياة ناس كتير أشياء كتيرة
واني اخطط وامسك كذا مشروع ( مع صحباتي) يرفع اسم جامعتنا فوق اعلى من أي جامعة تانية موجودة


وان شاء الله لو في مشروع راح اكلمكم عليه ...وابغا مساندتكم ليا


سلام ...
ملاحظة..:
بعد ما سمعت لعمرو خالد (حدد هدفك ) من برنامج حتى يغيروا ما بأنفسهم
مررررررررة اتحمست وهذا اللي شجعني اكتب الموضوع
ترى كلامه مررررررررة روعة
واكيد كلكم عارفينه
(في احد مايعرف عمرو خالد..)
اسمعوا له وان شاء الله تنبسطوا وتتحمسوا زيي
وهذا اللينك اللي تحملو منه
U11P_5YESy1b7tG.rm (http://www.u11p.com/folder2/U11P_5YESy1b7tG.rm)

يالا ...دي المرة من جد سلام
واشوف مشاركاتكم

تحياتي
Dr.roro0o0o

[Dr-futuer]

موضوع ممتاز

عجبني اسلوبك في التدرج للنهاية

مبدئياً أنا معاك

وأول شي باغيره

إنه يصير حضور المحاضرات اختياري

لاأحد يضحك

والله باتكلم جد

يعني الانسان محاسب على وقته

أنا شخصياً عندي 40 ساعة أسبوعياً

الاستفادة الفعليه لاتتجاوز 4-5 ساعات فقط

والباقي هباءاً منثوراً

بينما لو استغليت هذا الوقت في شي نافع راح أنجز

أما بالنسبة لهدفي الحقيقي في الفترة الحالية

إني أشيد حيلي في دراستي عشان أكون نموذج

لطبيبة مسلمة(ملتزمة) ناجحة

والله يقدرني على اللي فيه الخير

لنا عوده

ومشكورة أختي على الطرح الراقي

[Haitham]

RoRo0o0o

الصراحة الموضوع رائع ويحتاج الى تفكير واعادة حسابات للناس اللي ما لهم أهداف

فكرة الفريق او
Cheer Up Team

تعتبر من أنجح الطرق حاليا وصراحة أنا ما أعرف تفاصيل الطريقة اللي قمت بعملها

بالنسبة ليه أنا كنت بأم القرى وأتخرجت وحاليا بكلية الطب بالحرس الوطني بالرياض
MD programm
and we learn her depend on the PBL methods with EBM

أرى أن يتم التركيز على طريقة عمل الفريق لأنة عقل واحد لما يفكر مش زي عشرة عقول

هدفي في الحياة
أني أترك بصمة في التاريخ البشري على عده أصعده

لي عودة ان شاء الله تعالى

تسلمي على الموضوع

تحياتي للجميع

[PutrI]

السلام عليكم ورحمة الله وبركااااته..

اهليييييييييييييين رورو..

والله ..وزمااااااااااااااااااااااااان عالمنتدى...

وانا أقول ايشبه المنتدى منور ....<<<< كلو عشان رورو دخلت ونزلت موضوع ..:D

صراحة الموضوع دا في بالي من زمان .. وانت ما شاء الله لحقتي تنزلي الموضوع قبلي...<<<< أصلا عارفة انو أفكارنا زي بعض...مو أخوات .. لازم;)

الله يحمينا لبعض يااااارب


المهم ..

انا هدفي في الحياة .. زي هدفك بالززززبط...

اني أكون طبيبة مسلمة متفوقة.. تقدر تشرف الاسلام ولو بعمل بسيط...

خدمة الناس على قدر الاستطاعة ...

تغييير المجتمع لنحو الافضل ...

إدخال الفرح والسرور لقلوب من حولي ..بمشاعري الصادقة تجاههم...


:rolleyes: :rolleyes: امممممم


بس ...

هذا اللي عندي دحين ...


وفي عندي هدف مؤقت لحدت الاجازة الكبيرة .. وإن شاء الله يتحقق..<<< بس هو سر ... ماني قايلته عشان لحد يضحك علي..:o

سلاااااااام

[Dr.M3M]

ما شاء الله روروووو

موضوعك مميز وفكره رائعه

بصراحه مره جذبتيني بطرحك >> طرح مميز دي نقطه في صالحك

عزيزتي

هدف حياتي من يوم ما كنت صغيره
إني أكون نموذج للطبيبه المسلمه التي توفرت في تخصص قل ما تتخصص فيه النساء

أما هدفي الحالي للتحقيق الهدف المستقبلي
إني أشد حيلي وبقووووووووووه

عزيزتي

لي عوده للموضوع ودمت بخير وعافيه

[RoRo0o0o]

سلااااااااااااااام لأغلى ناس

حبيبتي فيوتشر
والله كلك ذوق
:o :o


وترى معاكي حق بالنسبة لموضوع الحضور والغياب بالمحاضرات
تراه المفروض يكون اختياري
لأنه وعلى قولتك الوقت من ذهب
وصراحة مو كل المحاضرات الواحد ممكن يستفيد منها
ويكون أحسن لنا اننا نقعد في البيت ونذاكر في داك الوقت اللي لحنا نقدر نستفيد منه ولا نفيد
بس يا شيخة...مع الأيام كل شي راح يتغير للأحسن ان شاء الله

(بس على ما اعتقد ...انهم حاطين للحضور درجات ...وهذا في رأيهم ..وسيلة مساعدة لينا عشان نزود منهادرجاتنا ...والله أعلم..يعني كله في صالحنا);) ـ


وربنا يكون معاكي في كل خطوة ان شاء الله
وتحققي هدفك:) ـ

أختك..
رورو

[RoRo0o0o]

أخي هيثم
تسلم على مرورك الكريم بموضوعي

ومن جد ...تحديد الهدف يبغاله تخطيط وفهم وادراك للهدف وأبعاده ونتايجه
فأكيد يبغاله وقت

وبالنسبة للفريق تبعنا
اللي هو
Cheer Up Team

لو حابب انك تعرف كيف اتكون
فراح تلاقيه في موضوع مجهر الأحبة
اللي اتورطت فيه حبيبتي وصدقتي وغاليتي بابينا
(اللي كانت بتورط بيه غيرها....ككككك:D )
فهي كاتبة عنه الشيئ البسيط


وما شاء الله عليك
انت في كلية الطب بالحرس الوطني بالرياض
الله يوفقك ان شاء الله
ترى دراستكم مرررررررررة شي خطير
مررررررررة عاجبتني طريقتكم بس انها صعبة شوي
ويبغالوا الواحد على طول الكتاب في يده

وعندكم مواد ومواضيع جناااااااااااااااااااااااااااااااااااااان
زي مثلا...
كيفية تفكير الديانات والعقائد الحياتية الغير اسلامية والاسلامية بالنسبة للحياة ما بعد الموت
(أعتقد الموضوع ..شي زي كدة ..انا ماني فاكرته)

ومواضيع تانية كتيييييييير
ترى مرررررررررة عاجبتني:cool: ـ


أووووبس
أكيد مستغرب
أنا كيف عرفت بدي الأشياء:confused: ـ

لأنو أخويا بيدرس في نفس كليتك
وهو دايما بيحكينا و يعلمنا الأشياء الغريبة اللي بتدروسها واللي احنا مابندرسها

يوووووه
معليش
دخلتك في مواضيع مالها داعي:o ـ



بس ان شاء الله هدفك يتحقق وتترك بصماتك الرائعة في كل مكان تتواجد فيه
وترفع بيها مقام أمتنا


أختك
رورو

[RoRo0o0o]

وعليكم السلام ورحمة الله وبركاته
أهليييييييييين بخيتي الصغيرة
انتي ورايا ورايا
مو كفاية في البيت
خخخخخخخخخخخخخ
امزح:p ـ
دحين مو تروحي تشتكيني لماما

لا لا لا ...انا عارفة انك عاقلة وما راح تقولي شي

بس ترى مررررررررررة انبسط انك شاركتي معايا

و الحمد لله اني سبقتك في وضع الموضوع


اصلا انا وانتي واحد
مافرقت مين حطه

المهم الفائدة اللي بترجع منه
صح..ـ


ربنا يخلينا لبعض دايما وما يفرقنا أبدا.....ـ

حتى في الجنة ان شاء الله نكون مع بعض بجوار حبيبي

حبيبي رسول الله صلى الله عليه وسلم



و ان شاء الله نقدر نحقق أهدافنا ونساند بعض على طول




هاااااااااااا
ترى انا عارفة ايش الهدف اللي مخبيته


اقول


اقول



لا ...لآ .. انا ماراح اقول

وترى محد راح يضحك عليكي
و حتى لو كان هدف بسيط أو تافه في نظرك

بس هو شي كبييييييييير ...ـ
بما انك بتحاولي انك تحققيه و تجتهدي وبتبذلي طاقة كبيرة عشان توصليله


سلام ياختي
واشوفك على خير
(بعد ما تصحي من النوم)
خخخخخخخخخ

رورو

[RoRo0o0o]

Dr.M3Mتشكرات كتييييييييييير خيتو
من جد والله كلك ذوق
وتسلمي قلبو على مرورك

وان شاء الله تكوني من أحسن الدكاترة اللي في الدنيا
وخلينا كده نقوّم الدنيا
إن شاء الله

وشدي حيلك كتييييييييييييييير
بس انتبي ....عشان لا ينقطع عليكي
:p ;)


ربنا يوفقك ان شاء الله


واشوفك على خير

أختك
رورو

[sun rise]

رورووووووووو كيفك اخبارك ايه من زمان عن هذي المواضيع

فكرة الموضوع جدا رائعة
اااااه انت حتقوليلي على الأهداف

كان عندي هدف اني أألف كتاب و اخترع شي و طموحات جدا عاليه :rolleyes: البنت محسبه نفسها عالمه

بس شكله كلللللله راح من بعد ماشفت التعامل في الكلية هذي يعني بالله شوفوا على قولة فيوتشرطريفة الشرح عندنا كيف
1- سرد المحاضره و قرائتها يعني بالله حنا مانعرف نفتح اي كتاب و نقرا نطلع على النت و نفهم نضع اسئله بنفسنا و نشارك مع بعض
2- تعودنا على اننا نتلقى المحاضره فقط نسمع لا يوجد اي نقاش ايش الي استفدناه بهذه الطريقه ذحين في الإكلينيكال كل دكتور يبفى احد يتناقش يسأل يعني بعد 4 سنسن صمت جايين يقولونا هيا تناقشوا ياربي على القهر
3 - احيانا اقول ليتهم مايعطونا مذكرات و يقولوا هذا الشيء هو الي انتم مطالبين به و بعدين يجيبوا اسئله لا يمت بالموضوع باي صله بالله هذا سؤال ذكاء ياناس سؤال الذكاء يجي بنفس الموضوع بس بطريقه اخرى مو شي مااتاخذ
4- المعلومة اذا انعطت اعطونا هي من البدايه بدون ماتتكرر كل سنه بحيث اننا نستفيد بعدين
يعني مثلا ECG من سنه كم ونحنا بناخذه ؟!!! من سنه اولى
ومتى فهمنا و لله الحمد في سنه خامسه هذا اذا كنا فهمنا بجد كان يمدينا صرنا اسشاريين بكمية المعلومات الي يعطونا هي
الله أكبر الله أكبر
5- الابره الابره في الدول الاخرى من اولى وهم يعرفوا يضربوها ونحنا ياغافلين لكم الله:confused:

معليش طولت عليكم لكن من القهر الي احس فيه
اخر شي اقوله انو نفسنا نعلم السنين الأوليه بعض من الأشياء الي احنا فاهمينها على اساس لا تروح سنينهم هباء منثورا لازم يستفيدوا من سنواتهم هذي و يستمتعوا بيها بنفس الوقت
وسوري على الإطاله حاسه راسي صدع

[Angels' Call]

RoRo0o0o
موضوع شيق ومتميز
بالنسبة لهدف حياتي
ولله الحمد عندي عدة اهداف وليس هدف واحد
وساذكر منها
كان هدفي دخوول المجال الطبي سؤاء طب او علووم
وقدر الله دخولي للعلوم والحمد الله
لكن عندي هدف ورا الهدف الأولاني الي هو
انقاذ اخواني المسلمين في الدول التي ابتعبتها الحرووب
وهدت بعزيمتها الجرووح
ان اعيد مجد الإسلام الذي ولى ولكنه سيعوود
فالشمس لابد أن تشرق

هذه بعض من اهدافي
ششكرا على موضوعك

[Dr_ Sama]

السلام عليكم ورحمة الله وبركاته
زي ماوعدتك رح أشارك بالموضوع
لأنه أكيد روعة
ولأنك انت اللي كاتبته
وكمان لأنه فيه
كلام عن الشخصية اللي احترمها كثييييييييييييييييييييييييييييييييرا
(عمرو خالد)

هدفي
كل اللي احب اكتبه انه والله أخذ مني
خمس سنوات

حتى ماوصلت لتفاصيل تفاصيله وبدأت
الحمد لله
بخطواتي الأساسية
وإن شاء الله ربي يوفقني


تسلمي يارورو على الافكار الروعة
وإن شاء الله نشوفك وبابينا وأخواتكم في اجتماعنا يوم الخميس

[BaBiNa]

صديقتي الغالية والحبيبة

RoRo0o0o

تفاجأت حقاً ... بطرحك الأكثر من رائع ومميز

:eek:

أسلوب متدرج جذاب ... لطرح الفكرة

بوركتِ غاليتي على طرحك هذا الموضوع لنتشارك سوية أهداف حياتنا

وأسأل الله أن يرزقنا تحقيقه والوصول صوبه في يوم من الأيام

:)

اممممم

لم اتفكر كثيراً لأكتب لكم هدف حياتي ... لأنه بإختصار مركب مختزل من ثلاثة كلمات ..!!ـ

ولكن تحليله صفحات وصفحات وبمراحل عدة .. وتأثيره لا بد ان يكون داخلي بذاتي .. وخارجي بالمحيط حولي!!!ـ


هدفـــــــــــــــــــــــــــي

مسلمة + انسانة + طبيبة

!!!!!!

>>>فهمتوا حاجه ...!!ـ

:confused:

مسلمة ... ان اكون نموذج للفتاة المسلمة أينما حللت في بقاع الأرض

بديني .. بأخلاقي .. بتعاملي .. بمبادئي

ولا أفقد هويتي الاسلامية في ظل بوتقة التحضر والعولمة .. ولاأنسى دوري كمسلمة في خدمة الاسلام والمسلمين!!ـ




إنسانة ... بإحساسي بمن حولي .. بتقديم العون لمن يطلبني .. بملامستي لهموم الناس وأفراحهم

بترك بصمات خالدة في حياة من أقابلهم .. بزرع البسمة وازالة الدمعة .. بتجسيد معاني التكافل والتعاون والأخاء

وألا أفقد انسانيتي .. واحاسيس انوثتي ...في ظل معترك صعاب الطب وجبروته!!ـ




طبيبة ... أخاف خالقي في عملي .. أخلص في ادائي .. أطور ذاتي وعلمي وخبراتي لمن أرواحهم امانة في عنقي

أساهم في رفع المستوى الصحي لمجتمعنا .. وربما اتخصص في تخصص نادر !!ـ

فمهنة الطب ... أمانة كبرى.. بإرداتي رغبت بتحملها .. لذا استشعرها كل حين .. فتكون دافع لي




أما المحيط الذي اعمل عليه لتحقيق هدفي ... هو ذاتي .. والمحيط من حولي (الناس والمجتمع والأمة الاسلامية)ـ




أما بخصوص مراحل .. تحقيق هدف حياتي

فالمرحلة الأولى .. بدأتها في مرحلتي الثانوية .. وحققت الجزء الذي وضعته لنفسي أنذاك

المرحلة الثانية ... في حياتي الجامعية ... ومازلت أرسم خطة تلو الأخرى لأحقق الجزء الخاص بهذه المرحلة

>>>نعمة انو دراستنا 6 اعوام .. يعني عندي فرصة كبيرة ووقت كافي ..هاهاهاهاها

والمرحلة الثالثة ... حين أصبح طبيبة!!!ـ

:)




هذا السرد كله الذي أزعجكم به ... هو مختصر مبسط لهدف حياتي

;)

أرجو ألا تكونوا قد تهتوا في متاهات فلسفتي

>>>مشوا حالكم .. وحدة فيلسوووووووفة .. رورو .. تعرفني .. هاهاهاها

:D

أعذروني على الإطالة

ودمتم بكل الود,,,

[mussam8]

شكلك يا بابينا تبي تاخدي النجومية من اللي طرحت الموضوع
هههههه